E pelicula ‘No Mishi’ a lastra bay cu casi tur premio incluyendo Best Film den loke tabata e edicion 2026 di 48HRS Film Project Aruba despues di un competencia intenso unda diferente ekipo di cineasta local a haya e reto pa produci un pelicula cortico den solamente 48 ora.
Na 2019 tabata ultimo biaha cu esaki a keda organisa na Aruba, despues a bin pandemia y te aworaki a logra introduci esaki bek na nos isla. CINEARUBA semper a bin ta kere duro den e potencial di cine riba nos isla, y pa sigui desaroya cu esaki. Dus awor tin pensa pa continua den organisa e festival aki anualmente pa duna nos localnan mas oportunidad pa experiencia algo unico riba nos isla cu ta hopi creativo y positivo.
Durante e ceremonia di premiacion, e ekipo tras di ‘No Mishi’ a ricibi e noticia cu nan pelicula a sali como ganador absoluto, provocando un celebracion grandi entre e miembronan di e produccion. Bon mereci, pasobra e film, genero di Horror, a keda sublime, hopi bon traha pa algo cu mester a haci den solamente 48 ora pa loke tabata e 48HRS Film Project Aruba.

48HRS Film Project: creatividad, presion y trabou duro
Segun e ekipo ganador di e 48HRS Film Project Aruba, e proceso tabata uno yen di tension, poco soño y hopi trabou. For di desaroyo di e storia te na filmacion y edicion, tur cos mester a keda cla den e tempo limita. Bo ta haya e elementonan pa traha cu ne, por ehempel e nomber di persona, un frase cu mester wordo bisa, anto un prop cu mester uza, hunto cu e genero cu bo mester traha.
E 48HRS Film Project Aruba sigur a bay hopi bon, motivando hopi local pa sigui desaroya nan mes den mundo di cine.
E ekipo a logra entrega nan pelicula solamente 10 minuut prome cu e deadline, demostrando e dedicacion y perseverancia necesario pa completa e reto.
‘No Mishi’ lo representa Aruba na Corsou
Cu e victoria aki, ‘No Mishi’ lo haya e oportunidad di representa Aruba na Filmapalooza na Corsou, un festival internacional cu ta reuni produccionnan di diferente pais y ciudad cu ta participa den 48 Hour Film Project.

E organisadornan a enfatisa cu e competencia no ta solamente pa gana premio, pero tambe pa stimula creatividad, desaroya talento local y motiva mas hende pa drenta mundo di filmmaking.
Segun director di e film ganado, Ken Wolff, e mensahe pa cineastanan cu ta cuminsa ta cla: no warda pa tur cos ta perfecto. Cuminsa crea, sigui purba y no entrega.
Djis Pa Informa ta presenta pa Awemainta: E diferencia den Noticia.

Dicon pafo di Aruba bo ta haya mas apoyo di hende? | UNSHOW EP. 13
~ July 19, 2026
Pafo di Aruba, hopi biaha, hende desconoci ta sostene y apoya bo hopi mas lihe cu bo propio hendenan. Esey ta algo cu ta un…
Caquetio: The First Nation of Aruba
~ July 22, 2025
Do you know the difference between the Arawak and the Caquetio? Welcome to another edition of The Sly ‘N Slide Tour Guide, where today, we dive…
Tin hopi hende cu cholesterol halto na Aruba
~ July 17, 2026
Cholesterol halto ta algo cu varios pashent na Aruba ta sufriendo di dje actualmente, na unda cu e cifranan recien ta mustra casi 15 mil…