Nos a haya un invitacion for di Fundacion Contra Violencia Relacional, pa bay rond Aruba y puntra hende diferente pregunta relaciona cu Orange The World. Esey ta un campaña anual unda ta conscientisa riba abuso di hende muhe, y akinan FCVR ta percura tambe na Aruba trece e mensahe tur caminda pa stop violencia contra hende muhe y mucha muhe.

Durante e recorido aki, nos mester a puntra hende homber y hende muhe algun pregunta diferente. Nos ta sigur bo mester por a mira algo color oraño caba rond, of un di e representantenan di e fundacion compartiendo e mensahe rond, haciendo e trabao di conscientisacion cual ta hopi necesario riba nos isla.

Orange The World ta e oportunidad pa esaki. Pa sigui na kibra e taboo ey un poco mas den nos comunidad, tocante cosnan cu nos mester por siña papia habri cu otro.

Esaki ta temanan cu ta bini cerca na nos tur, primordialmente pasobra nos tur tin un mama, un yiu muhe, un sobrina, un nieta, un ruman muhe, un prima, un hende muhe cu nos ta stima y generalmente e hende muhe den su totalidad cual merece proteccion y mester por sinti su mes safe tur caminda cu e bay.

Nos ta pidi boso tur pa sostene e campaña aki, ban no ignora of sigui neglisha e temanan aki pa asina nos por desaroya un comunidad mas uni, mas alegre, cual na su turno lo haci un pais mas progresivo den tur aspecto.

Un saludos na FCVR, masha danki pa haci Djis Pa Hari parti di esaki, pa conscientisa y stimula nos hendenan. Boso sigui cu e tremendo trabao cu boso ta haci dia aden y dia afo, cosnan cu boso ta enfrenta cu mayoria no sa mes, y boso ta haci e di curason, cual ta di aprecia.

Nos lo semper t’ey pa sostene e causa! Nos tin algun parti di video mas pa bin dus pone atencion, y laga bo comentario, a bo ta haya cu hende muhe na Aruba ta safe riba caya? Y kico bo ta haya mester cambia pa aporta of contribui na siguridad di nos hende muhe? Join e combersacion, sin miedo, eh!