Carnaval 70 ta nos tras y netamente ora cu bo a pensa cu e bomboshi tambe a caba, ata nos bro Darren van Ommeren, presidente di SMAC, ta bin aden cu algo extra pa sacudi cos un tiki mas.

Diamars atardi SMAC a anuncia durante un conferencia di prensa unda nan a repasa algun punto di con nos dushi Carnaval 70 a bay, pero sigur tambe tocando otro puntonan cu ta necesario. Manera boso ta corda, tabata tin algun h*demento entre SMAC y Stichting Musica atrobe e aña aki pa loke ta organisacion di festivalnan di musica.

“Nos tabata tin un Carnaval 70 super exitoso unda cu nos tabata tin mas o menos 39 evento den seis siman, incluyendo e evento di 11-11 caminda nos a habri e temporada den gran forma. Y esaki a sigui na culmina diadomingo ultimo den un gran parada di Aruba su Carnaval,” segun sr. Camel – sorry – Darren a expresa durante e conferencia di prensa.

ESAKI T’E OFERTA, TUM’E OF LAG’E!

Dus den corto, SMAC a caba di manda un carta – of wel, un email dirigi na Stichting Musica unda cu a duna nan un oferta pa loke ta bira maneho di e festivalnan di musica durante temporada di Carnaval. Pa motibo cu nan ta carga e nomber di musica – ta haya nan ta mas cu fit pa por carga e responsabilidad pa esaki, ja. Den e oferta, ta papia di maneha of tin fecha di Festival di Caiso & Soca Monarch, pa nan por sigui haci esaki na un balor di 25 mil florin – cual ta bira e suma di contribucion na SMAC pa organisa esaki.

Siguiente punto cu SMAC a toca den e oferta of wel oferta number dos: pa Stichting Musica tuma e festival di Calypso & Roadmarch Infantil y Hubenil y tambe un pakete incluyendo Caiso & Soca Monarch na un balor di 15 mil florin – HEPA! Of..e di tres oferta, pa tuma ful e pakete di musica, den e caso aki cu ta Festival di Tumba Infantil, Hubenil y Grandi, y Calypso & Roadmarch Infantil y Hubenil, como tambe Caiso & Soca Monarch tambe e ora tuma tur over, sin tin cu paga NADA, sin embargo den e caso aki tur gasto lo bay over den man di Stichting Musica.

“Pa nos por resolve tur issue cu por tin y claridad, nos ta pone esaki riba mesa, y nan tin mas o menos 14 dia – pa 4 di maart lo tin cu duna reaccion si ta accept’e, of cua di e puntonan ta accepta, pa nos tin claridad riba esaki,” Darren ta bisa. Den futuro, unabes cu nan haci esaki, ta conta cu un contract cu lo mester cumpli cu ne, anto e contract aki tambe lo encera cu nan lo bay riba schedule di SMAC y lo haya proteccion. Dus den sentido cu no lo tin evento mesun dia, y tipo di cosnan ey. Si nan no tuma esaki, SMAC lo tin cu tuma decision kico lo bay haci cu e festivalnan di musica, y con lo hinca esakinan den otro.

Dus, no lo haci e evento hunto, pero Stichting Musica lo ta encarga cu esaki y SMAC lo duna e sosten di ta riba e schedule, den marketing, den anuncio, pero esaki ta mas bien pa tin claridad riba con e ta bay keda organisa den futuro. Cos ta serio! Nos lo warda wak kico Stichting Musica lo reacciona, pero tanten, ban sigui disfruta di con e Camel ta subi Darren hasta despues cu temporada di Carnaval termina.