Tin hopi chens bo a dal den dje caba riba nos Facebook of Youtube – The Sly N Snide Tour Guide, cu Beach Lama, y si bo no a dal den dje of wak e ainda, bo ta masha laaf anto bo merece un trofeo di Laafheid of algo asina. E segmento nobo aki awor ta ricibiendo sosten for di AHATA (Aruba Hotel and Tourism Association) kende ta co-sponsor di un segmento cu su meta ta pa conscientisa riba turismo responsabel, Aruba su cultura, historia y herencia.

Beach Lama, di Djis Pa Hari – kende recientemente a caba di corta su dreads pasobra e no a haya un chick pa yud’e laba esakinan segun e ta bisa nos, ta e protagonista di Sly n Snide Tour Guide. Beach ta bisa cu e idea aki a nace for di e hecho cu e ta wak hopi programa riba Youtube, principalmente over Aruba pero ta ripara cu e hendenan cu ta produci esaki mayoria no ta Rubiano. “Y loke nan ta trece dilanti ta leuk, pero e ta un tiki superficial y no ta bay mucho den loke nos ta yama e esencia di ta Rubiano of di pais Aruba.” Beach tin hopi aña ta traha como un Tourguide tambe dus esey ta haci e trabao hopi mas facil cu tur e conocemento cu e homber aki tin den su cabes tocante Aruba su historia, cultura, tradicionnan y hopi mas.

CEO di AHATA, sra. Tisa Lasorte ta bisa nos cu e motibo dicon nan ta sostene e segmento aki ta pasobra e ta promove Aruba su atraccionnan. “Cual por ta no tur hende tin bon educacion kico e atraccionnan ta y kico e kiermen pa nos pais,” Tisa ta expresa. E segmento ta promove nos cultura, y ta promove Aruba generalmente pero cu sentido di responsabilidad cu un mensahe scondi aden un tiki pa corda e turista pa gosa di nos pais den manera responsabel.

Djis Pa Hari kier gradici AHATA pa e sosten aki mientras ta cuminsa e etapa nobo cu e tipo di segmentonan nobo aki cual di berdad tin Aruba na pecho, cu meta pa sigui hiba nos isla na un otro nivel den loke ta promocion, y media generalmente. Masha danki AHATA!

Pa mira e diferente episodionan nos ta invita bo pa Subscribe na nos pagina di Youtube di Djis Pa Hari, anto Like y Follow nos riba Facebook cu Instagram pa asina bo keda den contacto cu nos y haya semper tur notificacion riba e produccionnan nobo na caminda di Sly n Snide Tour Guide y hopi mas! Ambiente!