Diabierna 12 di april ta bay tin e di 32 edicion di Ronde Van Aruba. Esey ta e evento anual caminda cu boshi di hende ta boluntariamente kies pa dal un buelta na pia rond di Aruba te casi cay flow y mata curpa. Nos a bishita e diferente grupo y team ViperStrong durante nan Pasta Night den pleno preparacion pa Ronde van Aruba, disfrutando di un dushi pasta for di nos bon amigo Jason Fun di Tastebuds Aruba – ora bo kier lunch algo diferente djis bay check e cantina na WEB.

Locual a hala nos atencion mesora ta cu varios di e coredonan ta parce a drecha barba y dal un bon pela, un bon feita pa mustra nechi pa e Ronde van Aruba. Un argumento cu un di e coredonan a trece dilanti ta cu cada gram di peso bo kita for di bo curpa – den e caso aki cabey –  ta haci bo mas ‘light’ dus mas lihe bo lo core. Interesante.

Nos no tabata na altura cu esaki ta un di e rekesitonan pa bo por forma parti di e evento deportivo aki cu ta basta intenso riba su mes. A pesar cu aña pasa, nos ta corda cu algun coredo femenino a bay e careda ful na make-up cu cabey bon drecha, pa despues na final, wel, nos no a logra wak con nan a keda pero nos ta sigur nan a keda na werki.

RONDE VAN ARUBA 2024

Jareth Vermeulen, tesorero di ViperStrong ta bisa nos cu diahuebs anochi nan a bini hunto pa dal nan pasta pa carb-load up asina nan por ta bon prepara pa e fierno cu ta spera nan – joke, dus pa e Ronde van Aruba 2024. Nan a bini cu e capitan di tur team, cual ta 22 team den total, anto a bin pa papia riba nan tactica, comparti algun storia, pasa pret den un bon ambiente pa prepara p’e Ronde. Riba e anochi aki a haci entrega oficial di uniform y nombra e Vipers (coredonan) cu ta mas destaca p’e cumisamente di e aña aki.

ViperStrong tin dos record caba riba nan nomber den Categoria A cu B, anto p’e aña aki nan kier bay p’e siguiente recordnan. “Nos kier wak kico nos por logra, no tin ningun meta principal pero nos kier haci mas miho di loke nos a haci aña pasa,” Jareth cu su mustachi bon drecha ta bisa nos. Jareth ta bisa cu nan tin varios luna ta train, prepara e teamnan, y nan ta den total cinco coach cu ta haci esaki.

E ta un tiki dificil pasobra ta varia den edad y diferente ‘pace’  pero asina toch ta keda percura pa ta cla pa esaki. Nan no ta haci wega, nan ta train serio y train duro pa prepara p’e Ronde.  Tur cos ta cuminsa diabierna 8’or, cu un total di 220 team, consistiendo di 149 estaffete, 14 single, 57 duo, dus cos ta hot.