Un bon pregunta. Ora cu bo analisa e situacion actual di prensa di Aruba, no pa generalisa, pero cos ta basta na werki si. Por miho. Den tur forma y aspecto. Un punto cu ta bini hopi dilanti ta e falta di seriedad y etica den periodismo, cual ta laga hopi di desea mes riba nos islanan, no ta na Aruba so.

Andreina Morillo, periodista y co fundado di RAPP – Red Arubiano di Prensa Profesional, a papia cu nos durante e prome Caribbean Journalism Seminar organisa diabierna pasa na Impact Hub Aruba.  E lansamento oficial di e asociacion RAPP tambe a tuma luga dus pa medio di e evento aki cu invitadonan special, uno internacional cu a bini for di Puerto Rico, Carla Minet. E ta traha den e centro investigativo di prensa na Puerto Rico. El a bin duna un charla riba e retonan cu nos periodistanan ta haya den Caribe.

Tambe tabata tin presentacion di Marlon Kock, UX expert, kende a duna un tremendo presentacion riba uzo di inteligencia artificial pa por ta mas productivo den e trabao. El a bini cu diferente bon punto riba con esaki ta revolucionando e manera di traha, sigur den area di periodismo tambe, cu ta brinda mas productividad pa keda cla mas lihe cu hopi trabao y hasta tambe mas preciso y responsabel.

KICO MESTER CAMBIA?

Hopi colega den media y prensa cu tabata presenta a comenta cu cos mester cuminsa bira mas profesional: e trabao mester bira mas investigativo y pa enfoca mas riba noticianan importante. Otronan a papia riba e presentacion, algun hende no ta gusta cosnan hopi largo mas dus mester haci nan corto y ‘to-the-point.’

E enfoke sigur tabata riba profesionalismo, pa nos periodistanan bay opera riba un nivel mas halto cu nan noticia, pa tuma les con pa skirbi y papia. “Pasobra papiamento riba television y radio ta teribel.” Un presentador di noticia mester semper ta neutral cu locual e presenta, y asina mas y mas e opinionnan y pensamentonan a keda comparti cu nos.

RAPP sigur ta bay ta hopi activo e temponan nos dilanti anto e meta ta pa bini cu un evento pa aña. Nan kier invita diferente profesional den periodismo rond mundo y region pa asina bini hunto y siña mas, crece mas, anto yuda nos periodistanan ekipa nan mes cu mas conocemento y experiencia profesional na Aruba.