Secrets Hotel na San Nicolas ta un topico grandi den e comunidad pariba durante ultimo aña. Hopi ta pensa cu esaki habriendo lo trece un bida grandi bek pa Sunrise City, y otronan ainda ta un poco skeptico cu e cos lo bay asina. No ta prome biaha ta primiti e pueblo di San Nicolas esaki, y no ta prome biaha a cuminsa construi un hotel – cual a keda na banana y ainda nos ta mira resto di esaki na final di e mainstreet di San Nicolas.

Den combersacion cu Earl Levons Sr, Sales Manager pa AEDA (Aruba Economic Development Alliance) ta bisa cu actualmente tin hopi politico ta campaña atrobe riba cambio pa San Nicolas. “Pero nos no ta campañando,” segun Earl. “Nos kier realmente trece un cambio pa San Nicolas den cuadro cu algo cu ta biniendo caba. E politiconan ta biniendo cu promesa di cambio pero esaki ta aki caba y nan mester ta papiando riba nos realidad: Secrets Hotel.”

E hotel lo bay habri otro aña cu 900 camber – e indicacionnan ta cu e proyecto aki so ta bay trece un flow di hende pa San Nicolas. Pero e comunidad mes no ta preparando pa esaki segun Earl ta apunta – mester cuminsa concentra riba e parti aki pasobra ora cu e hotel habri, mester tin varios negoshi den San Nicolas prepara pa tur loke ta bini.

AEDA ta yuda esnan cu tin ideanan pa negoshi den San Nicolas, si nan tin mester di informacion riba ki caminda pa cana, tambe bayendo den un partnership cu entre otro Qredits pa yuda aplica pa prestamo y haya fondo pa start-ups. Nos mes a combersa cu un persona cu a caba di habri un barberia den San Nicolas, anto e ta hopi positivo cu e movecion aki. Pero, segun Earl, San Nicolas mester boshi cos mas. Alomenos dies car rentals, panaderia, watersports, y boshi otro cos.

Kico abo mes ta pensa? San Nicolas ta bay porfin mira cambio positivo y progresivo cu e hotel nobo aki? Laga bo comentarionan den nos postnan riba social media, Facebook & Instagram, discuti cu otro, dialoga, pero den forma constructivo si! Of ja, haci kico boso kier, ta internet toch.

Pa mas informacion riba AEDA, boso por check nan online of yama nan riba +297 733 3300.