Aruba Tourism Authority (A.T.A.) un bes mas a organisa ‘Voices Of Tourism’ cual ta un tremendo conferencia inspirativo cu meta pa cultiva interes, compromiso, y pasion cerca nos hobennan studiante den ramo di hospitalidad y otro areanan, cual ta representa e bos di e presente y futuro di nos turismo. Dicon? Pasobra den e muchanan aki tin algun cu pronto lo uni nan mes na e sector di turismo, entre otro.

E programa ta enfoca riba studiantenan di E.P.B., E.P.I., y algun studiante di Universidad di Aruba, kendenan ta representa e gran parti di forsa laboral y e futuro lidernan di e industria di turismo na Aruba.

Na comienso por a tuma nota cu e hobennan no sa exactamente kico pa spera – pero manera cu orador internacional Trent Shelton drenta e sala, e energia ta cambia mesora. A bolbe invita Trent despues di un conferencia aña pasa cu tabata basta exitoso tambe pa asina e bin conecta un biaha mas cu nos hobennan durante dos mainta di conferencia den Renaissance Convention Center.

A traves di su propio proposito , Trent a guia e audiencia na con pa yega na nan proposito, nan poder, y nan paz interno. Su mision di bida ta pa conecta e hende cu e miho version di nan mes, comunicando directamente di su experiencia propio.

Cu su plataforma global, Trent ta conecta cu su audiencia via diferente charla inspirativo, podcast, buki y audiobook, e rednan social, e cursonan di salud mental y maneho di bo mente pa menciona algun. E conferencia di e aña aki, titula ‘It All Starts With You’, a empodera y ekipa e studiantenan pa asina nan por refleha riba nan proposito, crecemento, y potencial personal. Durante di e conferencia, algun studiante a ricibi e buki ‘Protect Your Peace: Nine Unapologetic Principles for Thriving in a Chaotic World’ skirbi pa e propio orador Trent Shelton y T-shirts di ‘It All Starts With You’.

Alabes, studiantenan a comparti nan desafionan cu nan ta topa cu ne den nan vida diario, y tur locual cu nan a adkiri di e conferencia.E conferencia a conta tambe cu palabranan di Ronella Croes, CEO di A.T.A. kende tambe a comparti su motivacionnan personal, su bista riba bida, felicidad, con pa keda consistente, motiva y finalmente su mensahe di motivacion pa cu bida personal y profesional.

A.T.A. ta gradici tur esunnan cu a contribui na e programa, incluyendo e studiantenan, e docentenan, ekipo di A.T.A., y e ekipo di Trent Shelton. Ta un honor di por a brinda e hobennan e plataforma aki pa dialoga, intercambia di pensamento y expresa nan mes. A.T.A. ta hopi orguyoso di nos hubentud kende a participa cu e orador y haci di e dos dianan di conferencia, e momentonan fantastico.