Esnan cu a crece cu programanan di Venevision, Radio Rochela, el Chavo del Ocho, of cualkier di e programanan Spaño ney – Pasobra masha tiki tabata tin produccionnan Local obtenibel – sigur por a disfruta di un era hopi dushi di entretenimento y contenido, full prome cu e mundo loco di social media cu nos tin awe. Aki nos ta papiando di programanan cu bo no por a warda pa yega cas despues di scol of trabao pa bo relax bay wak e. Bo ta corda?

DPH Media Verse ta presenta un concepto nobo, cual lo bira un combinacion di tur e miho elementonan cu e team aki a brinda nos comunidad durante e ultimo añanan. Nos no ta bay inventa e wiel full di nobo, mas bien nos ta bay update e completo, pa Aruba sigur.

Ora cu Djis Pa Hari a inicia na 2017, a bay over cu e meta pa sigui desaroya. Awe, DPH Media Verse ta un Production House cu ta produci un variedad di proyecto audio visual, a lansa Stichting Djis Pa Hari Media Verse tambe pa yuda den e proceso di stimula nos industria creativo.

Con bo ta stimula algo cu ainda no ta existi?

Dificil. Specialmente ora cu bo ta biba riba un isla caminda cu e ultimo 30 aña e enfasis di tur gobierno cu a bini y bay, di tur organisacion gubernamental of no gubernamental cu a bini y bay, di tur profesional y academico cu a bini y bay, tabata e desaroyo y progreso di un industria turistico.

Y nos ta aplaudi esaki. Sin un industria di turismo fuerte, awe nos no lo ta unda nos ta na Aruba. Sin embargo, henter e desaroyonan aki a bini cu su cosnan positivo, y no mucho positivo. Nos tur conoce e cosnan positivo: nos a bira un di e destinacionnan di vacacion di mas popular na mundo, e ta loke ta genera placa pa nos mas cu tur otro cos (y nos no tin echt mucho, of well, nada otro), anto turistanan ta stima bini nos islanan anualmente. Tin algun cu a haci e isla aki nan segundo hogar. Tur esey ta zuiver.

E banda no mucho positivo di e desaroyonan aki a trece cu ne un negligencia den tur otro posibel pilar economico cu tambe lo por ta un fuente grandi di entrada pa e pais.

Pa nos no bay mucho leu pasobra ta hopi cos tin, laga nos keda kinan den e parti creativo, cultural y artistico. Si ta un cos nos isla ta produci, ta talento. Nos tin asina hopi talento riba nos isla cu bo mester ta mas ciego cu Ray Charles y tur otro artista ciego pareu, cu un bril di palo, y tambe cu un paña scur scur mara riba bo wowonan pa bo no mir’e.*Cu tur e talento aki cu tin, den baile, actuacion, pintamento, skirbimento, filmacion, y asina tanto disciplina artistico, e pregunta cardinal ta keda, kico nos ta bay haci? Sigui core cu nos talentonan pa pronto bini un t*nti ‘brain drain’ riba nos isla den e parti aki?

Nos ta bay sigui neglisha e parti esencial aki den desaroyo socio-economico di un sociedad?

E forma con nos di DPH Media Verse ta stimula un industria cu practicamente no ta existi, ta simplemente por medio di trah’e nos mes.

Di e forma aki nos ta contribui na e desaroyo di nos industria creativo, sin realmente tin uno ainda, basicamente lantando esaki for di nada. Den colaboracion cu otro creativonan, talentonan, genionan, y Arubianonan cu simplemente ta arma cu diferente abilidad y conocemento den arte pa haci algo cu esaki pa nos bida, pa nos famia, pa nos comunidad. E no ta facil, nos ta lag’e mustra asina.

Nos ta traha dia aden y dia afo, haciendo manera cu esaki ta algo normal caba, cu tur e retonan y desafionan increibel cu nos ta topa cu ne!

Mas ariba bo por a mira un foto di Roberto Gómez Bolaños “El Chavo” hunto cu su brodernan Ramón Valdés “Don Ramón” y Carlos Villagrán “Quico”, un inspiracion pa generacionnan largo. Y ata nos awe, haciendo mescos, creando personahenan cu ta refleha nos comunidad, treciendo alegria y uzando e medio di arte audio visual pa conta nos storianan den nos mesun manera.

Cu e proyecto nobo ‘UN SHOW’ nos ta spera di por sigui traha duro den e trayectorio aki di nos progreso creativo como individual y team, pa brinda e comunidad di Aruba algo autentico cu e meta pa hiba nos un stap enbes di patras.

Keda bo pendiente. Nos ta trahando duro pa lansa esaki pa 2024, anto nos ta kere bo ta bay enjoy e concepto!