Bo sa, tin ora ta nice pa bo bay haci algo diferente cu ta bay bebe den un bar, bay riba un
Bustrip cu hendenan cu eigenlijk no ta ni gusta bo, of gasta placa den cos cu bo no echt mester. Tin biaha, ta bon pa saca un tempo y hiba bo famia, bo yiunan, bo nietonan of amistadnan pa bay wak un obra di arte. Prome cu tabata existi un television, of internet, hende tabata bini hunto hopi mas pa e tipo di cosnan aki. E ta locual ta haci nos humano di berdad.

Creative Arts Aruba, un fundacion cu ta dedica na promove y stimula creatividad riba Aruba, nan ta duna les di actuacion pa obra di teatro pero tambe pa dilanti di camara y produccion audio visual. E grupo tin un otro obra di arte na caminda y nos kier a invita bo cordialmente pa bin wak con duro e hobennan aki a traha p’esaki.

INHUSTICIA RIBA ARUBA!

E storia aki ta un continuacion di e prome storia. E prome tabata yama ‘It begins’, mientras cu esaki tin e titulo di ‘Missions.’ E escritor y director di e obra aki, kende tambe ta duna e hoben y muchanan les, Charles Croes, ta conta nos cu It Begins tabata trata di un mucha homber jong y su tata cu a bay Aruba na unda el a conoce un mucha muhe y su famia. Aki nan ta bay biba hunto y pasa den diferente aventura.

E segundo show ta un continuacion, despues di algun aña cu nan a conoce otro y biba hunto. E spiritonan y misticonan ta sinti cu tin un inhusticia na Aruba. “Hende blanco ta reconoce manera hende blanco, y hende preto reconoci manera hende preto. Pero, den parti anochi ora e cosnan romantico ta pasa,a resulta den un nacemento di boshi hende mix cu no ta wordo reconoci, pa motibo di berguensa.”

E mission di e spiritonan y mistico ta pa haya dos hende cu por construi un scol, y e motibo pa e scol aki ta pa educa tur e hendenan mixto pa nan por compronde kico ta pasando y bira lidernan. “E mission ta pa construi un scol pa hende por siña, ni preto ni blanco pero pa esnan mix por siña mantene nan responsabilidad.”

Basta cos di e storia ta fantasia.  E ta un storia, simplemente un storia, pero tambe cu e meta pa pone bo pensa un poco. Esaki ta parti dos di un trilogia.

 E obra di arte ‘From Where We Came: Missions’ lo tuma luga riba 1 y 2 di december, na Scol di Arte San Nicolas.