Fin di siman pasa a tuma luga e di 14 edicion di Aruba International Regatta. E ta basicamente un evento di bela, boto, yate, celebrando hunto nos dushi lama y naturalesa pa medio di nabegacion. Grandi y chikito por participa, tin diferente careda y esaki ta algo sigur hopi importante pa organisa riba un Isla, cu ta practicamente rondona door di awa, duh.

Rik van der Vaart, president di Stichting Aruba Regatta ta bisa cu e edicion aki ta hopi special pasobra nan a crece masha hopi compara cu aña pasa. Nan tabata tin mas cu 60 boto riba awa, tur tipo di boto di mucha te cu adulto, yate, windsurf, y boto miniatura. “Nos ta masha contento di por organisa esaki y duna e pueblo di Aruba un spectaculo di Bela.”

Un mayor ta conta nos cu ta pa prome biaha nan yiu ta participa, e ta haya esaki hopi bon organisa y toch hopi ameno, “e calor so ta cansa mi,” e mayor a expresa. E mucha tin 13 aña so, e mama tabata hopi nervioso na comienso pero por mira cu tin hopi hende ta compaña e muchanan anto e ta asina bon hinca den otro cu e ta duna bo siguransa tambe. “Y mi a bis’e disfruta di dje, no worry cu e careda.”

​NATURE, PEOPLE AND SPORT

Aña pasa tabata tin hopi interes di hende jong tambe segun Rik pero den temporada di augustus hende ta bin bek for di vacantie y ta cuminsa bek cu scol, dus nan no ta realmente cla pa traha riba bela. Awor Regatta ta prome cu vacantie grandi pa asina e muchanan por mustra nan tactica cu nan a siña. “Nos lema ta Nature, People & Sports. Nos ta purba trece tur hende mas cerca di naturalesa por medio di sport, e deporte di bela ta un di nan. Esaki ta un deporte specifico cu na Aruba nos tin e lama, playa, solo y biento y nos ta gewoon un Paraiso perfecto den mundo anto nos kier mustra esey na tur cu ta amateur of kier cuminsa, cu esaki ta e luga cu bo tin cu bin pa aprecia y respeta naturalesa pero tambe gosa di dje.”

BOTO MINIATURA: BO NO MESTER TA CHIKITO PA OPERA NAN

​

Clifford Rosa di Stichting Rancho tabata encarga pa organisa e parti di e caredanan di Boto Miniatura y ta bisa nos cu esakinan ta botonan di tradicion. E ta un herencia cultural intangibel, e no ta boto chikito pa mucha chikito. Den pasado, Clifford ta bisa, nos hendenan despues cu nan tabata tin careda di boto di piscado, nan tabata cuminsa cu careda di boto miniatura.”Esaki ta algo cu bo ta wak di generacion pa generacion y sigur bo ta wak muchanan tambe mester por siña core boto miniatura.” E parti aki sigur ta algo hopi importante den parti di educacion pasobra ora bo sa con pa maneha un boto miniatura e ta habri bo ideanan den futuro pa por core un boto mas grandi tambe.