Eleccion ta 6 di december venidero, y varios di nos ta fada caba y pura pa e cos ey caba. Primordialmente pasobra nos no ni tabata mester a tin eleccion aworaki, casi hode ful nos temporada di dianan di fiesta.

Nos a scucha varios politico bisa cu nan no ta bay sali afo cu campaña di sticker y bandera, y hopi di e mesun politiconan aki toch a haya nan mes obliga di bay pompa trafico y haci esaki. Pa otro politiconas, esaki ta algo normal, dus nan a sali bay cu gana hode trafico y cansa caya di hende cu no tin gana di entretene nan promesanan y payasadanan.

SOCIAL MEDIA

Riba rednan social, e eleccion aki bo por ripara tambe con mas hende ta envolvi si den e discusionnan. Hopi mas hende activo den e Live streams di programanan politico, debatenan, y tambe vociferando nan opinion riba diferente videonan of entrevistanan cu politiconan ta publica. Riba social media por mira e opinionnann di esunnan di mas “sabi” te esunnan cu ta claramente basta pendeu. E ta hopi mas cu antes, y si bo wak bon, bo por mira con e ta wordo bon uza y unda e ta mal uza tambe.

PERO, KICO TA E REALIDAD?

Wel, hopi mas hende sigur ta mas consciente, mas atento, y den algun caso por durf di bisa tambe cu hende ta mas skerpi. Algun politico ultimo tempo no tabata ni durf pa enfrenta hende den bario, preferando pa djis laga flyer den mailbox y move bay. Esey ta bisa algo si.

Den tur e comentarionan online cu nos mes ta haya, como tambe riba otro plataformanan, bo ta ripara si cu hende ta hopi mas dispuesto pa habri nan smul tambe, a pesar cu ta tras di computer, telefon, fake account, of nan enorme ego.  Un cos ta sigur: Aruba ta fada si. Cos mester cuminsa draai otro aki banda, no solamente den politica so. Den nos organisacionnan gubernamental, fundacionnan, institutonan, riba caya, y den nos hogarnan.

E PALABRA “CAMBIO”

Nos hendenan ta fada di wordo bisa cu lo tin “cambio” anto e palabra ey mes un djis lo mester exigi pa elimina completo for di e vocabulario politico di con hopi biaha e ta wordo ripiti. Cansa caya. Nos hendenan ta cansa di promesanan, y presentacionnan cu discursonan di yen plan bunita, pa despues nos tin cu sali for di nos cas core riba careteranan cu ta totalos.

Esey ta si bo tin un cas mes, pasobra hopi di nos no por ni yega na haya un palapa drechi mas band’i lama, hera ta oportunidad pa tin bo propio cas. E isla chikito, dushi, y bunita aki awor ta pasando den un siguiente fase; of nos ta cuminsa bay dilanti di berdad of keda pega den tempo, cu e chens di hasta bay hopi aña mas atras.

Dus pa conclui, Aruba ta fada di politica barata, pero kisas nos no por papia pa tur. Pasobra ainda bo por mira varios hende cu ta parce nan nunca no lo por wak mas leu cu nan nanishi den loke ta progreso di nos isla, y ta keda cay pa kico cu ta, pa medio di ken cu ta, pa despues bay vota con cu ta, pone un hende ey den cu lo bay haci kico cu ta, djis pa e keda cobra bon.

Nos tin un chens berdad como pueblo pa cuminsa tin un ambiente di progreso diferente riba nos isla, anto e ta cuminsa cu cada un di nos. Votamento, eleccion, politica, ta bay solamente te na cierto caminda, pero nos como ciudadano, como empresario, como studiante, mama, tata, yiu, artista, musico, chef – nos como Rubiano, unda cu nos por ta, por semper haci hopi mas pa impacta nos comunidad y mundo henter den forma constructivo y progresivo.

Aruba ta fada di politica barata, riba un isla asina caro, nos ta spera di por cuminsa hisa e calidad di nos liderazgo. Nos por.