Riba 18 di mei, Dia Internacional di Museo, varios museo y localidadnan rond Aruba a organisa diferente actividad rond di esaki, un di e lugarnan aki tabata Museo Cas Tan Tin. Museonan rond Aruba a habri nan portanan pa comunidad di Aruba y turistanan bishita nan y conoce tur loke tin.

Richard Tromp, manager na Museo Cas Tan Tin ta conta nos cu pa loke ta e pregunta si awendia nos ta biba miho cu antes na Aruba, bo no por ful bisa cu esaki ta e caso. “Cada epoca tin su cosnan bon y cosnan malo.”

Tromp ta opina cu actualmente nos por bisa cu bida ta bon pa hopi hende, pero antes nan tabata bisa esaki tambe. Ta dificil pa compara ora cu tin hopi cambionan cu ta facilita nos bida. Antes por ehempel hopi hende tabata mas flaco, pero esaki tabata pasobra tabata tin hopi trabao di man, prome cu era industrial bo tabata haya mas hende ta traha of construi nan mesun casnan cu nan propio man. Dus bo ta constantemente den movecion. Awendia por ehempel cu bo ta den un oficina bo ta move menos.

Cas Tan Tin su mensahe ta pa sigui crea conscientisacion no solamente riba 18 di mei pa bishita museo, pero pa semper sa cu tin hopi museo rond Aruba cu bo por bishita henter e aña anto cu bo por admira cultura di Aruba. Na Cas Tan Tin por ehempel bo por mira con nos famianan humilde tabata biba den tempo di antes, cu un cantidad di artefacto cu por bin admira. Tin varios museo rond Aruba pa mustra con e cambionan a tuma luga y pa nos keda consciente cu cultura ta parti di nos. “Cultura t’ey pa keda, y nos ta keda ofrece na comunidad.”