Depresion NO ta wega: Stichting Hunto ta comparti algun tips

Depresion NO ta wega mes. E tema di depresion y salud mental ta un taboo grandi ora ta trata pa ‘open up’ y dialoga riba dje, pa comparti cu otro nos dolor como ruman, ser humano, como hende – e berguensa y orguyo hopi bes ta domina. Mas nos papia riba e temanan aki, mas chens nos tin pa yuda otro, y finalmente yuda nos mes si nos ta pasando den un lucha contra depresion.

Compronde pa kico depresion NO ta wega!
Nos tin cu yuda otro.

Marcelino Mauricio, Zorg Manager na Stichting Hunto – ta maneha e parti di diferente departamento den Stichting Hunto. Marcelino a bin comparti cu nos diferente puntonan of señalnan pa tene na cuenta ora ta trata ‘sintomanan’ di un persona cu tin depresion.

Depresion por wordo categorisa den diferente forma for di leve te cu mas pisa, y Marcelino ta splica den detaye kico ta e factornan pa tene na cuenta cu ne. Por ehempel, un persona cu semper tabata contento y direpiente e no ta papia mas, e no ta smile mucho, e ta hopi keto – ta un sintoma of señal cu algo ta pasando cu ne.

Marcelino a bay den detaye riba e factornan aki, di cual bo por scucha den e entrevista/video ariba completo. El a bini cu un hoben cu tambe ta bataya cu depresion, cu a saca e curashi pa busca ayudo, y aworaki e mes ta riba e caminda di ta un bon ehempel di con bo por lanta para y haya lus den scuridad.

Esaki ta un tremendo entrevista pa bo scucha, y comparti cu bo sernan keri of amistadnan.