Wak, nos tur sa cu tin problema den nos hubentud y algun di nos hoben adultonan.

Hopi no a caba scol, no kier traha, kier core caya, hode cu hende su bida, hode nan mesun bida, etc. Nos ta consciente cu e problemanan social, problema cu salud mental, falta di atencion na loke ta e puntonan di mas crucial pa haci un comunidad stabil, e bienestar di e ser humano cual ta ‘suppose’ di ta ”central”, pero laga nos ban haci e cos ki un asunto politico.

Nos sa e problema. Awor ban concentra riba solucionnan! Esey ta exactamente loke Stichting Ja Ik Aruba ta haciendo cu e programa aki titula In The Picture. 

Esaki ta un programa cu Antonia a cuminsa cu ne na Hulanda. Pero cuater aña pasa el a bin biba bek na Aruba.

E tin su mesun negoshi y tambe hopi bes ta ocupa su mes cu proyectonan pa stimula liderazgo, training y coaching.  “Mi ta mira hopi talento na Aruba, pero nos no ta wak e talentonan tin exito.”

E programa In The Picture a bini cu un otro oportunidad awor y net e siman aki (bo tin tempo ainda ruman) pa e betana cera. Nan ta buscando hoben ainda entre 18-28 aña cu no tin trabao of scol, bo por tin un side-job, esey no ta un problema. “Please acerca nos, esaki ta un oportunidad cu bo no kier perde.” E programa ta siña bo con pa lidera bo mes, bo ta haya training y coaching den cosnan cu bo mester di dje den bida. E ta gratis, bo no mester paga niun florin. 

Pero esun cu ta interesa y kier compromete na esaki, mester ta dedica na e programa for di curason y enfoca pa yega na exito. Por yama libremente riba 699-2242.