Despues di un aña den e programa IN THE PICTURE di Stichting JA IK Aruba, un grupo di hoben na SPO Sta. Cruz a keda contento di por a experiencia esaki anto ta pidi pa mas! E programa a consisti di diferente bishita na varios compania rond Aruba na unda cu e hobennan por a siña mas tocante etica laboral, liderazgo, y un poco di e trabao pa medio di participa tambe cu practica.

E programa aki a bin ta desaroya den e ultimo tres aña despues di pandemia cu e meta pa stimula determinacion, persistencia y pasion den e participantenan, pa asina nan crece den un forma positivo haciendo nan consciente di nan balor dentro di un organisacion y comunidad. E programa aki ta realisa cu e sosten di CEDE Aruba y Samenwerkende Fondsen Cariben. Na final di maart 2023, Stichting JA IK Aruba a cuminsa cu e grupo di Scol Practico Pa Ofishi (SPO) Sta. Cruz y Brasil. Nan a logra organisa varios bishita manera STR Agriculture, Botica di Servicio, COMPRA LTD y hopi mas. E studiantenan di SPO Brasil y Sta. Cruz a haya un tremendo experiencia den bishita e diferente companianan aki cu a habri nan porta pa inspira e campeonnan aki.

Den colaboracion cu JA IK Academy, ta bin un proceso den midi e potencial completo di cada participante pa asina por haya mas informacion riba nan liderazgo personal, cierto cualidadnan y forsanan natural. E midimento personal ta haci online via un instrumento cu ta midi e diferente abilidadnan di un persona na un nivel mas profundo. Cu e data aki, por descubri diferente tipo di puntonan importante pa enfoca den loke ta crecemento personal y talentonan scondi. Pronto lo cuminsa cu mas grupo mientras e programa aki ta sigui crece.

Pa mas informacion, bishita Stichting JA IK Aruba riba plataformanan social of nan website https://jaikaruba.com/, como tambe JA IK Academy pa bay mas den loke ta maneho di un organisacion of negoshi riba https://businesscoach.consulting.