Diaranson merdia IBS Group a organisa un conferencia di prensa na unda a presenta e lansamento di un donacion kiosk na Super Do It Center, un colaboracion entre CEDE Aruba, Fundacion pa Nos Comunidad, Do It Center y IBS. Hunto a bini cu e proyecto aki pa asina haci un diferencia, uni forsa y sostene un bon causa. E ta un iniciativa unico caminda bo por uza e kiosk pa haci bo donacion na Fundacion pa Nos Comunidad den un manera hopi moderno!

E Kiosk ta un mashin inovativo, nobo y diferente, hopi atractivo. Awendia masha poco hende ta cana cu cash riba nan dus esaki ta un forma hopi facil pa bin cu bo debit card, kies cuanto bo ta bay duna na donacion, haya bo recibo di bo donacion y bo ta cla. Maidi Maduro, director di Operations na IBS Group ta bisa cu Samsung a introduci e Kiosknan aki basta tempo pasa anto IBS a haya e oportunidad pa representa nan. Awor nan ta cla cu link e na sistema di pago cu e Kiosk, unabes esey ta cla bo ta bin cu ideanan inovativo riba con mas por uz’e.

“Bo por uz’e pa paga na supermercado, restaurant, etc, y bo ta sigui pensa kico mas por haci cu ne, esey ta inovacion, locual cu IBS ta para p’e.”

E fundacion ta hopi contento cu e gesto aki e ta algo hopi tremendo den forma cu e fundaicon por beneficia di dje. E ta un sistema cu ta brinda acceso na diferente persona cu por haci donacion of cu kisas no tabata sa di e Fundacion, cu e proyecto aki nan ta hasta por haya sa mas ainda.

Nos tur ta custumbra den wak un caha pa donacion pero esaki ta algo sigur hopi mas inovativo y diferente. Henter comunidad di Aruba ta cordialmente invita pa bin pasa bishita Super Do It Center na Shaba y prome of despues di haci bo compras, pasa wak e mashin y duna bo sosten na Aruba su banco di cuminda, Fundacion pa Nos Comunidad, kende ta haci hopi bon trabao pa yuda nos hendenan den necesidad aki na Aruba, bay check e!

Si bo ta un doño di compania of instituto interesa den e sistema of Kiosk aki, tuma contacto cu IBS Group Ingenius Business Solutions na 587 0040 of sales@ibs.group pa mas informacion.