MetaCorp a habri museo prome biaha pa publico durante Openmonumenten Dag 2024

Published | Sep 17, 2024

Riba diadomingo 15 di september, Stichting Monumentenfonds Aruba hunto cu Hulanda a celebra monumentonan den un forma basta zuiver. Durante henter dia, na Aruba tabata tin 13 edificio – monumento – Habri cu diferente actividad pa comunidad por disfruta di dje, y haya chens di mira algun di e monumentonan pa prome biaha paden, siñando mas di nos historia cu ta boshi tin. Na Hulanda tabata tin miles di monumento habri, un celebracion di nos monumentonan, nos herencia y historia.

MetaCorp tambe a dicidi di participa y asina habri nan museo priva pa prome biaha na publico. Esaki ta un museo cu tin hopi artefactonan historico, bieu, di diferente epoca, reflehando e tantisimo historia y storianan cu MetaCorp tin, y su contribucion na Aruba su progreso socio-economico. Nos a haya un tour rond di e luga, unda cu por topa cu diferente camara y ekipo di cine di antes – e lugar ta sigur un hoya di museo. Tin un area hopi special dedica n’e empleadonan di tur negoshi bao MetaCorp cu a traha cu nan pa decadas largo. Master mes.

Lo tin posibilidad cu e lo ta habri pa publico atrobe pronto? Kisas. Pero pa awor, e ta bay keda algo cu ta nifica hopi p’e compania MetaCorp y su empleadonan den cuadro di educacion, y formacion di empleadonan di tur companianan cu ta cay bao di nan. Conociendo nan historia, e pasado y progreso di MetaCorp, pa asina por compronde e nificacion grandi di un di Aruba su companianan cu a brinda asina hopi oportunidad di trabao riba nos isla y contribui masha hopi mes, pa mas cu 100 aña te cu awe. E lugar y concepto sigur ta algo di aplaudi!

“Mas cu 625 bishitante a participa den e tour cu guia den nos museo priva. Nos bishitantenan tabatin oportunidad di aprecia obhetonan original y antiguo, y tambe haya sa algun historia interesante cu kisas nan no tabata sa prome. Y tambe, mayoria a sali mas inspira ainda cu ora nan a drenta, cu e pensamento pa nunca stop di traha duro pa bo logra bo metanan y pa haci nan realidad.”

“Tabatin hopi empleado cu a fungi como boluntario durante e actividad, orguyoso pa comparti e historia di MetaCorp cu comunidad. Mi ta yama danki na Stichting Monumentenfonds, nos empleadonan y e comunidad di Aruba pa haci e evento aki un exito rotundo”, asina nos COO di MetaCorp, Shensly Tromp a comparti.”

TOCANTE METACORP

A funda MetaCorp na aña 1920 y a start den negoshi di cine. Cu un simpel intercambio di e pianola di Shon Eddy de Veer pa e projector di Shon Nadie Henriquez .Y asina a establece e negoshi di cine y alabes Shon Eddy de Veer a establece e fundeshi di MetaCorp. Awendia MetaCorp a crece y bira e compania di mas bieu, di mas grandi y mas diversifica di Aruba. Un compania cu a conoce diferente generacion.

E historia di MetaCorp ta cubri mas cu 100 aña. Como e compania di mas bieu di Aruba, nos a sinti cu esaki tabata e momento ideal pa comparti nos storia via e museo priva durante e evento aki. A comparti e historia di nos comienso, crecemento y unda nos ta awo. MetaCorp y e crecemento di Aruba ta conecta hunto door di un elemento esencial: Nos hendenan.