Bo tabata sa cu tin un Film Festival na Aruba? Fundacion Cinearuba a organisa Playa Film Festival cu a tuma luga entre 19 di juli pa 21 di juli, consistiendo di tres di di presentacion di diferente pelicula y entregamento di premio.

Esaki tabata e di cuater edicion cual a inicia desde aña pasa November 2023 cu inscripcion di peliculanan. Despues a sigui cu e seleccion y na final presentacion. FILOMENA, e short film di mas recien produci pa Stichting Djis Pa Hari Media Verse. E ta un Short Film dirigi pa Ronney Dotel, cual a participa y bay cu dos premio tambe, bon cos!

UN OTRO EDICION EXITOSO

Fundacion CINEARUBA ta wak bek atras na un otro edicion realisa exitosamente yena cu dos anochi di presentacion di peliculanan di tur parti di mundo. Cas di Brenchie tabata e anfitrion di Playa Film Festival. Nan a percura pa un ambiente caluroso den centro di ciudad, pa ta exacto Wilhelminastraat, Playa. E Film Festival aki na Aruba ta uno hopi necesario y cu tur aña ta sigui crece.

E anochi a culmina na Santos cu entregamento di premio unda cu ‘I Am Not Down’ di India a gana e premio pa miho pelicula cortico international. Den e categoria di Kingdom of Shorts e pelicula cortico local ‘Filomena’ a gana e premio publico pa miho pelicula, y tambe e premio di hurado pa miho actor Beach Lama.

Otro premionan hurado a bay pa ‘Cachot’ pa miho pelicula, miho actriz Shari Oleana, miho director Samueldavid Baromeo y miho cinematografo Refael Kariodimejo. 

Fundacion CINEARUBA kier gradici tur e cineastanan pa a participa y tur e personanan cu a asisti na e presentacionnan. Tambe un gradicimento na Setar, Cede Aruba, VNO, Santos y Areopuerto Internacional Reina Beatrix pa e sosten. Inscripcion a habri caba pa e siguiente edicion di Playa Film Festival y por haya mas informacion na: filmfreeway.com/playafilmfestival.