No mas hotel pa Aruba?

Atrobe nos ta topa cu un ‘trend’ nobo riba isla di Aruba, cu lo bay wordo lubida despues pa un rato, manera semper, ora cu e populacion ta keda distrai pa un otro fiesta of algo kens cu ta kita nos dushi Arubiano su atencion for di temanan mas serio.  Pero e declaracion, ‘No Mas Hotel’, ora abo scuch’e, kico e ta pone bo sinti?

Durante nos encuesta pa haya sa kico hende ta pensa di henter e asunto aki di ‘No Mas Hotel’, nos a bin ta tuma nota tambe cu e protesta aki no ta solamente pasando na Aruba so. Tin varios otro parti di mundo caminda cu tambe e residentenan, ciudadanonan, hendenan cu ta fada di tanto na tanto desaroyo riba e lomber di e pober, kier un ‘break’ di henter esaki.

No mas turista. No mas hotel. Esaki ta un protesta cu ta resona na varios parti di mundo aworaki. Na Spaña por ehempel, y kisas bo no a scucha di dje pasobra media tin semper cosnan ‘mas importante’ pa papia di dje y raporta.

Ta hopi ta e temanan recientemente cu ta dividi nos, den politica, religion, sexualidad, y awor tambe den industria y comercio. Un cos ta sigur, hende ta bay sigui biaha rond mundo dus pa awo lo tin turista – si no bin un otro f*cking Covid of algo parecido. Dus den otro palabra, mundo ta bay sigui draai, industria di turismo lo sigui desaroya y re-inventa su mes manera cu ta pasando actualmente.

Nos tin cu sa cu semper ta bay tin discusion y un banda semper no lo ta di acuerdo cu e otro banda. E importante mester ta pa cada banda scucha y respeta opinion di otro, anto sikiera purba na yega na otro. Bin cu solucion, no causa mas problema. Esaki sigur lo ta un tema cu lo keda bini dilanti y cu nos lo zorg tambe pa pasa pret cu ne anto duna boso mas contenido!