Ki bo sa di ‘responsible tourism’ ah? Si bo ta sigui DJIS PA HARI riba su plataformanan social y website, lo bo por a tuma nota di e segmento nobo SLY ‘N SNIDE TOUR GUIDE di Beach Lama. Esaki ta un segmento totalmente diferente cu ta promove historia, cultura, y herencia di Aruba y Caribe, como un plataforma pa entretene, informa y educa. Recientemente Aruba Tourism Authority tambe a join pa sostene e segmento aki, cual ta un logro hopi grandi pa DJIS PA HARI y Beach Lama su producto cual tin un potencial enorme pa sigui expande.

Beach Lama ta bisa cu trahando e segmento aki ta manera un ‘labor of love’ pasobra e conceptualisacion di e segmento riba su mes ta un di cosnan sigur cu e ta gusta haci.  “E ta tuma hopi trabao pa haci e registro, mi’n ta gaña bo. Pero, sigur sigur ora bo jega na traha e storia mes, pa mi esey ta e parti divertido.”

Ronella Croes, CEO di Aruba Tourism Authority ta bisa cu nan ta hopi contento cu ta uza e palabranan ‘responsible tourism’ y cu pa nan e ta hopi importante pa determina con por jega na e audiencia desea. DJIS PA HARI ta brinda e oportunidad pa por papia cu nos bishitantenan, cual ta hopi importante segun Ronella, Pero tambe pa nos comunidad. Pa loke ta trata nos bishitantenan, e ta importante pa nan ta consciente kico e isla ta para p’e. “Loke ta importante pa nos awor den presente, y nos futuro, y mescos pa nos comunidad. ” Pa ATA, semper ta un placer pa por colabora cu nos industria creativo den produci contenido cu ta yuda nan jega na nan metanan.

TURISMO RESPONSABEL

E promocion di turismo responsabel bao di nos comunidad ta segun Ronella algo logico. Pasobra e responsabilidad di Aruba mas protehi, no ta den man solamente di nos bishitantenan, pero den man di nos comunidad tambe. “Na final di dia, nos kier pa Aruba y su turismo ta uno duradero, pa largo plaso. Semper un turismo lo tin su retonan, su oportunidadnan. Semper nos lo tin localnan, kisas bishitantenan cu nan preocupacionnan, y nan felicidad pa nos desaroyo, esaki ta varia. Pero, nos no mester lubida ambos su papel den yuda nos proteha e Aruba cu ta duna nos bishitantenan, pero tambe nos localnan asina hopi,” Ronella ta expresa.

Pa loke ta e siguiente temporada di e Sly ‘N Snide Tour Guide – pasobra e prome temporada piloto aki ta jegando su final – Beach ta bisa cu bo por sigur spera hopi mas segmento, y hopi mas informacion tocante di cosnan cu kisas abo como local no tabata sa. Pero tambe sigur riba cosnan cu nos como local por comparti cu nos bishitantenan. “Primordialmente conscientisacion di e balornan cultural, historico, y claro ecologico,” Beach ta bisa.

Aruba Tourism Authority ta bisa cu nan kier semper por conta pa termino largo cu e Aruba cu ta e ‘One Happy Island’ anto banda di tur esfuerso cu nan ta haci, pa educa y informa, haciendo esaki pa medio di e talento y contribucion di DJIS PA HARI, ta sigur algo hopi importante segun Ronella. Hopi cute mes, nos ta aprecia tambe. Kusjes.

Corda sigui DJIS PA HARI riba plataformanan social y keda pendiente pa e cosnan nobo cu tin den desaroyo pasobra hopi cos tin!