Stichting JA IK Aruba a caba di finalisa nan programa IN THE PICTURE hunto cu SPO. Sta Cruz y Brasil, na unda cu hobennan a haya oportunidad di participa y bishita diferente compania rond Aruba pa siña tocante etica laboral y liderazgo. Un programa positivo pa nos hobbennan na Aruba.

Marc Thiel, director di SPO Brasil ta conta nos cu SPO Brasil ta un scol practico cu ta cater na alumnonan cu tin poco dificultad cognitivo pa cu siñamento, pero cu hopi biaha nan ta hopi bon den e parti practico. “Esey ta e preparacion cu nos ta brinda nan pa nan por sigui sea studia of drenta e mercado laboral.”

E scol ta hopi contento cu algun di su alumnonan a haya e oportunidad pa participa den e programa IN THE PICTURE durante e aña tras di lomba. Mirando cu e scol ja caba ta prepara nan pa mercado laboral riba e parti practico, e programa a fit hopi bon cu locual nan mes ta haci na scol. E muchanan a haya oportunidad pa bishita diferente luga y amplia nan conocemento den e negoshinan cu hopi di nan ta duna oportunidad pa stage caba eynan.

Un total di dies hoben a forma parti den e programa, tin un diversidad grandi den e hohennan mes cu a participa. Algun tabata tin poco berguensa of ta poco ‘shy’ miedo di duna nan opinion of miedo di bisa loke nan ta pensa of kico nan kier haci. “Pero bo ta wak un crecemento den nan.”

Stichting JA IK Aruba ta hopi contento di por a organisa esaki pa e hobennan aki y ta spera di por sigui cu ne pa e aña escolar venidero cu un otro grupo mas, cu mas compania sigui habri porta tambe pa cu e bishitanan aki.