Studio Caribe ta un proyecto bao guia di NL Film Fonds cu meta pa yuda guia y desaroya Short Films for di Corsou, Aruba, St. Maarten, Boneiro, St. Eustatius y Saba. E meta grandi ta pa cuminsa stimula productornan y cineastanan (si e palabra ta existi) di e islanan pa asina tambe cuminsa comparti nos storianan cu resto di mundo.

Recientemente a organisa eventonan pa asina bo por haya informacion riba con pa realisa bo peticion pa haya fondonan pa haci bo pelicula posibel. Studio Caribe lo bay brinda e oportunidad pa desaroya 12 proyecto, y realisa 6 proyecto den categoria di Short Film.

Diabierna Atardi tabata tin un encuentro chikito na Museo Arkeologico di Aruba caminda por a network un rato cu esnan encarga y trahando directamente cu e proyecto Studio Caribe.

Pa personanan cu kier haci film esaki ta hopi importante pasobra nos sa caba con na Aruba nos tin hopi limitacion riba recursonan, manera placa, personal, y conocemento. Segun Juan Francisco Pardo di CINEARUBA, mas hende cuminsa haci film lo cuminsa bini un specialisacion, cu mas hende specialisa den diferente disciplina di film. “E ta un trabao mas colaborativo.”

Wendy York, producer di Studio Caribe ta bisa cu tin hopi storia den Caribe y si nos no haci algo cu nan sea via cine of otro forma, nan ta bay perdi. “Y tin asina tanto storia riba nos islanan cu nos mes por conta,” Wendy ta comenta. Asina mes! Nos di Djis Pa Hari a bay cubri e encuentro aki y tambe na mes momento bay participa pa haya mas informacion riba con nos por sigui contribui den e meta aki: desaroyo di nos industria creativo di film, unda nos tur tambe por cuminsa produci materialnan di calidad halto pa comparti nos storianan cu resto di mundo.

TA HAYA FALTA DI MAS STORIA DI NOS ISLANAN!

Monique Ruinen di Nederlands Filmfonds, encarga cu e proyecto di Studio Caribe. Esaki ta un proyecto enfoca riba busca bosnan nobo den islanan di Caribe. “Nos ta di Nederlandse Filmfonds, y islanan Caribense ta parti di e Reino Hulandes, y loke nos ta haya falta di dje ta storianan y bosnan di nos islanan.” Monique.  Studio Caribe ta e oportunidad awor presente pa esnan di Caribe por cuminsa desaroya nan mes den e area di cine y filmacion.

Pa mas informacion check e link aki:
https://www.filmfonds.nl/subsidies/subsidie/studio-caribe