‘Aruba su turismo a crece sin limite of maneho structural p’e no bira dimas’

E topico di turismo ta hot e ultimo temponan ‘ki, sigur ora ta papia di si Aruba a pasa su limite, y ta cuanto e isla aki por realmente sostene.

Aruba a surpasa su limite di turismo?

Si ta asina, con hopi? Nos mester por sa den cifra tambe ta con hopi e isla aki por wanta. Aruba su turismo a crece sin limite of maneho structural p’e no bira dimas, segun CEO di AHATA, Tisa LaSorte. Tur stakeholder hunto cu gobierno mester awo sinta hunto pa mira kico lo bira e strategia pa atende cu esaki.

Nos tin hasta un minister di Turismo actualmente cu a bini dilanti publicamente bisando cu e ta realisa cu mester bin un cambio den e rumbo cu Aruba ta tuma pa loke ta industria di turismo. Y esey, segun LaSorte, ta haci cu e combersacion awor ta sigui bira mas serio pasobra e ta biniendo pa prome biaha for di un gobernante.

Antes, e gobernantenan tabata mas bien custumbra na ta contento di con hopi turista nos tin, tiramento di fiesta, sacamento di potret, y generalmente djis hopi contento pasobra Aruba su turismo a genera basta bon cen. Sinembargo aworaki, e enfoke mester ta mas cu simplemente placa. Pasobra nos tur a mira kico a sosode durante Covid tambe, y kico tur t’e consecuencia riba nos medio ambiente y naturalesa.

Awor e combersacionnan aki ta birando mas serio di con ta cambia e strategia – pero ainda mester warda pa wak ta kico e “strategia” aki lo bira.

Djis Pa Informa ta presenta pa Awemainta: E diferencia den Noticia.