Buscando Husticia: Kico por miho na Aruba?

Buscando Husticia ta un edicion special di nos segmento Djis Pa Informa cual ta cuestiona kico por miho den husticia riba Aruba, y ta duna e plataforma pa comunidad y tambe autoridad ambos duna nan banda di medaya. Nos normalmente ta un plataforma satirico, dedica na haci cosnan pret y comparti humor. Pero, banda di esaki nos ta un plataforma di media cu ta dedica na traha pa pueblo.

Dus, nos por maneha aki aya algun tema serio ora cu tin mester, pasobra nos ta mira esaki casi manera nos deber tambe! Buscando Husticia ta simplemente un edicion special di un di nos segmentonan di informacion, nos manera pa contribui y yuda pueblo.

Mike Petronia ta buscando husticia pa su yiu muhe pa basta aña caba awor – e ta e tata di e mucha muhe Sayuri Petronia, kende a fayece pa medio di un arma di candela, anto e tratamento di e caso lo continua riba 24 november 2025.

E caso a tuma luga den juni, 2021 na cas di e sospechoso Izaak Principaal, unda cu e tabata hungando cu un arma – wel, esey el a declara anto, y na momento cu e pia di un stoel a kibra, esaki a causa cu un bala sali di e arma cu e tabatin den su man. E bala a alcansa su amiga Sayuri mortalmente.  

E caso a bay corte y na october, 2022, Corte di Prome Instancia a conden’e na 9 aña di prizon y TBS.
El a apela Hof a impone un castigo hubenil, e maximo di cuater aña mas e medida di PIJ (bou vigilancia).

Abogado di Izaak Principaal a dicidi di bay Casacion despues. A resulta cu Corte Supremo a ordena pa Hof trata e caso y tuma un decision nobo. Awor check esaki, e no tabata riba si e ta culpabel of no, pero riba e castigo cu e mester haya. A resulta cu a conden’e segun ley hubenil, y na mes momento a duna tratamento obligatorio.

No por dun’e ambos castigo. Den prome instancia a bisa cu conscientemente a huzga Izaak como adulto, a pesar cu e tabata tin 17 aña di edad ora e cos a sosode, mirando e cantidad di caso (5) den cual e tabata envolvi. Incluso envolvi den un drive-by shooting y atraco cu machete, dus e mucha homber tabata toch aparentemente ‘no mucho bon mucha’ tampoco. Mas ainda, Mike a sinti cu e tin cu sigui riba su caminda buscando husticia.

Buscando Husticia: Pueblo ta compronde e proceso legal?

Tin hopi hende buscando husticia riba nos isla, den diferente caso. Algun di nan tin famianan cu simplemente ta sigui grita pa husticia y pa nan haya contesta riba varios pregunta cu ainda a keda habri.

Nos a invita fiscalnan di husticia di Ministerio Publico pa duna nos un splicacion riba con generalmente cos ta traha ora ta trata bay c’un caso den corte, y castigonan cu nan ta haya. Na Aruba parce cu tin un ‘husticia di clase’ segun boca di pueblo pasobra no ta tur hende ta wordo trata mescos, y ta loke Mike Petronia mes ta purba na trece dilanti.

E fiscalnan a duna nan banda di medaya y splica detayadamente con e proceso ta traha, y nos ta aprecia nan pa duna nos e oportunidad di por entrevista nan libremente pa asina por comparti conocemento y informacion cu pueblo.

Check e segmento completo abao y no lubida di Like, Share, laga bo comentario y Subscribe riba nos YouTube pa hopi mas.