Cacho riba caya: Problema di bestia of di hende?

Cacho riba caya na Aruba: un h*demento completo.

E problema di cacho cu pushi riba caya na Aruba a rapidamente bira un otro tema pa causa division den nos comunidad.  Nos a haci un pregunta riba nos page di Facebook ‘Djis Pa Hari’ pa purba haya sa unda tin problema di cacho ainda, pa inclui den nos reportahe tocante e tema.

Esaki nos a compronde mesora cu no tabata bon idea pa haci di e forma aki, dus nos a delete e post. Pasobra a cuminsa acusa nos di colecta adres pa bay haci daño na bestia, dus venena nan.

Aparentemente lo tin hende cu ta haci e tipo di cosnan aki, wak riba internet unda hende ta keha of apunta cu tin cacho riba caya, pa nan mes tuma accion y ley den nan propio man. No ta leuk. Dus pa motibo cu nos no kier a contribui na esey, nos a lemai anto delete e post pa bay sigui busca e informacion den otro forma. 

Pero e drama a sigui.

Algun elemento tambe a sali for di dios sa unda, otronan a skirbi bijbel completo riba Facebook anto hasta conseha nos pa “stick to comedy.”

Nos a invita algun di nan pa duna nan comentario riba camara pero ta parce nan ta prefera di discuti riba Facebook, dus, ja.

Nos a purba di laga nan compronde, den nos forma colorido, cu nos ta simplemente buscando informacion pa un reportahe, y nada otro.

Cacho riba caya: Cunukero kier expone tur fundacion

Nos a yega di entrevista Jair Britten caba, un cunukero, pero e biaha aki el a yama nos pa un otro entrevista unda cu e tabata kier a adresa algun cos. Nan ta papiando yen cos di dje tambe – yen di acusacion cu e mes ta tras di esnan cu ta tumando accion den su propio man pa elimina cacho riba caya.

Nos a dicidi di bay papia cu mas hende enbes di yega publica otro entrevista cortico cu un solo banda di e medaya, y cu casi nada di informacion concreto.

Den e proceso aki – nos a dal den varios cos, insulto, pero tambe mas acusacion, y mas problema. 

Djis Pa Hari ta condena promocion di cualkier maldad contra hende of bestia – pero tambe loke nos ta condena ta ignorancia y mal informacion.  Y p’e motibo aki mester a shift e focus di e reportahe aki y busca mas informacion –  mirando e reaccionnan y acusacionnan haci online, pa percura nos traha un raportahe mas balansa posibel riba e tema.

Dus lagando tur otro coi mucha chikito un banda, nos ta presenta bo un edicion special di Djis Pa Informa, presenta pa Awemainta: E diferencia den Noticia.

Nos a acerca Cuerpo Policial y algun otro instancia concerni, pero no a logra haya nan banda.

Nos ta spera cu despues di a laga tur hende papia nan berdad, cu e dialogo keda habri y cu tur por uni cabes pa yuda enfrenta e problematica aki den e miho forma cu nos por. Pasobra yen cos por dividi nos, pero loke por uni nos ta mas fuerte, cual ta algo cu nos tur kier y ta comparti; Nos amor y bienestar pa nos dushi isla Aruba.