‘Database Cultural’ lo defini plan nacional di cultura pa Aruba di awor bay dilanti

Kico t’un Database Cultural? Wel esaki ta exactamente loke bo ta kere e ta, dus informacion riba tur aspecto di nos sector cultural. Pasobra data ta importante. Sin data, bo no sa unda bo ta para, sigur tampoco unda bo ta bayendo. Anto pa basta tempo na Aruba sigur pa loke ta cultura, nos ni sa unda nos ta, for di unda nos a bin, y sigur sigur unda donder nos ta bayendo. E ta bisto ora bo para keto y wak rond.

Departamento di Cultura Aruba lo tene un encuentro riba 13 di juni na JFK Edu Center caminda tur esnan cu ta labora of ta forma parti di industria cultural bini hunto pa repasa Aruba su Database Cultural. Esaki kiermen abo tambe por duna bo feedback pa asina hunto por crea maneho of plan nacional pa maneha nos cultura.

Algo cu lo ta standard y ora cu bini cambio den gobierno, esaki no lo por zomaar bay den lachi manera a bin ta pasa ultimo decadanan. E idea ta pa crea algo stabil, sostenibel, consistente y duradero. Bravo.

Esaki lo bay defini Aruba su futuro den loke ta maneho di cultura, unda hunto tur hende por trece idea pa crea un plan nacional di maneho. Pa mas informacion check e video ariba, y pa registra bo por check e poster/flyers cu tin akinan. Pas’e over na esnan cu bo conoce, ta bale la pena pa bini hunto pa scucha y duna bo input. Bo ta mas cu cordialmente invita!

Database Cultural: E encuentro lo tuma luga den e parti aki di JFK Edu Center

Djis Pa Informa ta presenta pa AweMainta: E diferencia den Noticia.