Participa den Departamento di Asunto Social su encuesta pa satisfaccion di cliente

Na cualkier compania of organisacion mundialmente, servicio na cliente ta esencial pa semper tin mehoracion di dje. Esaki ta conta tambe den e caso aki pa Departamento di Asunto Social.

Nos tabata un poco curioso pa haya sa cua kisas ta e kehonan of cambionan cu clientenan mes a yega di trece dilanti of cu ta actualmente mas frecuente. Sinembargo nos lo mester check bek cu e director di e departamento, kende lastimamente no tabata t’ey e momento ey – maybe next time 🙁

Pero nos a compronde cu Departamento di Asunto Social kier a anuncia un procedura standard den cuadro di e trayecto di certificacion di organisacion internacional pa standarisacion (ISO)

Departamento di Asunto Social ta lansa Encuesta di Satisfaccion pa Clientenan

Departamento di Asunto Social (DAS) ta continua trabou activamente riba mehoracion
continuo di e departamento y su servicionan. ISO ta un sistema di standardisacion reconoci mundialmente, cu ta establece criterio pa diferente aspecto di operacion di un organisacion, manera e calidad di servicio, proceso interno, maneho di informacion y seguridad. Pa medio di e proceso aki, organisacionnan por evalua y mehora con nan ta traha, cu e meta di ofrece un servicio mas eficiente, confiabel y transparente na e clientenan. Pa participa, den e encuesta, click AKI.

Un parti importante di e trayecto aki ta scucha e opinion di nan clientenan. En conexion cu dia
internacional di trabou social, ariba 17 di maart 2026, DAS a lansa un encuesta dirigi
specificamente na clientenan bou di e titulo “Satisfaccion di Clientenan”

Cu e iniciativa aki, DAS kier haya un mihor comprension di con clientenan ta experencia e
servicionan cu nan ta ricibi for di DAS. E opinion y experiencia di e clientenan ta di gran
importancia pa identifica kico ta funcionando y unda tin espacio pa mehoracion pa responde
mihor e necesidad di e clientenan.

E encuesta titula “Satisfaccion di Clientenan” ta disponibel den dos idioma: Papiamento y
ingles. E encuesta ta consisti di 21 pregunta y ta tuma aproximadamente 10 minuut pa por
completa.

E encuesta lo ta habrí desde 17 di maart t’e cu 31 di mei 2026. Participacion den e encuesta ta completamente boluntario. Tur opinion ta keda confidencial y lo contribui directamente na e proceso di mehoracion continuo di e departamento. Pa finalisa, DAS ta reafirma su compromiso pa sigui fortalece calidad di servicio y contribui na bienestar di comunidad di Aruba.

Djis Pa Informa ta presenta pa Awemainta: E diferencia den Noticia