‘Tur isla mester cuminsa prepara deposito di cuminda’

Deposito di cuminda, of Magazine pa warda cuminda – ta algo cu segun agricultor di Corsou di Fundacion Escuela Kohehe Agriculture, Wensley Martina mester ta e focus di nos islanan den Caribe. Sigur nos cu ta depende di importacion pa gran parti, pasobra aparentemente, tin h*demento grandi na caminda pa loke ta trata seguridad di alimentacion.

“Cientificonan tin diescinco aña ta papia caba di e cayente pisa cu ta na caminda, cual pa 2030 lo bini un cayente asina pisa cu nos no lo por sembra mas.”

Martina ta bisa cu esaki ta algo cu gobiernonan di nos islanan no ta mustra di ta tumando muchu na serio. Yen plantacion lo muri y lo bini problema cu cuminda. Lo mester cuminda den deposito pa e pueblo por wanta esaki.

Deposito di cuminda: con realistico esaki ta?

Ora ta trata un tema asina ta semper importante pa bo ta hopi critico pasobra, e ta cuminda – nos tur mester come tur dia. Kico ta pasa si bini berdad un desaster natural cu lo limita importacion di comestibel y of hasta perhudica esaki te na un estado asina pisa cu lo bira super dificil pa nos haya cosnan basico pa basta tempo.

Mester haci nos mes e pregunta tambe riba con realistico un deposito di cuminda ta. Ultimo cu nos a tende, nos tin reserva di cuminda aki na Aruba y tambe Corsou, pa mane dos of tres luna of zo.

Pero ora ta trata un deposito, of loke Martina ta propone aki, e preguntanan ta lanta; pa con largo esaki por dura pa crea un, y con largo e depositonan aki mester dura nos, con hopi cuminda mester tin deposita, unda lo bay haci esaki, for di unda lo saca fondo, y tur otro pregunta cu ta bini su tras – ta cosnan cu mester cuminsa dialoga riba dje awor.

Y pa loke ta Martina, e ta haya cu mester tin hende corecto den luganan corecto pa tuma decision corecto. “Scucha di e cunukeronan, esnan cu ta traha den veld, den solo tur dia, papia cu nan, scucha for di nan.”

Djis Pa Informa ta presenta pa Awemainta: E diferencia den Noticia.