Desiree Croes: ‘Nos ta perdiendo nos isla’

Nos isla…nos dushi Aruba…nos ta bendiendo of practicamente a bende mas cu mita di dje si – anto loke ta keda resalta ultimo ta cu parce nos ta perdiendo hopi di loke ta nos herencia.

E productor di ‘E Bruha Bruha’ y ‘Bruha Bruha 2’, Desiree Croes a pasa cerca nos na Djis Pa Hari Radio Variety Show den studionan di Wavez pa combersa riba su proyecto nobo, y tur loke e kiermen pa Aruba, e mensahe cu e ta carga, cual ta uno hopi cla!

‘Nos ta perdiendo nos isla’

Tin un pelicula local awor cu ta accentua riba e problemanan aki cu a bini cu e desaroyo grandi cu Aruba ta experienciando. Y prome bo bisa, ‘aino, pelicula local’, nos ta recomenda bo bay dun’e un chens, bay wak e cu bo famia, amistad, colega, amante – djis bay wak e, haci algo diferente un rato mientras na mes momento bo ta sostene nos propio hendenan.

E storia di e pelicula local ‘E Bruha Bruha’ ta uno adapta for di e cuenta cortico di Desiree Croes su buki ‘No Mas’ (2016) unda ta subraya kico un persona lo haci ora cu tin hende cu e poder pa kita bo cas for di bo.

“Nos generacion di 50+, 60+ a haci nos erornan, y awor e siguiente generacion ta bibando cu e dolornan di esaki”, segun Desiree Croes, abogado y productor di e pelicula ‘E Bruha Bruha’, como tambe e ‘Bruha Bruha 2: Blijf Hier!’ cual lo estrena den Principal Theater riba 12 di december.

E storia aki tin algo hopi profundo su tras di cual Desiree ta recomenda pa esnan cu di berdad tin e poder pa haci cambio manera politiconan, pero tambe educadornan, empresarionan, esnan cu influencia – bay wak y sostene e produccion local aki cu ta mandando un mensahe hopi grandi cu ta relata na nos tur cu ta biba riba e pida baranca aki.