‘Futuro di San Nicolas mester ta inclusivo y no pa grupito di hende’

Tin speransa pa San Nicolas, of e ta bay keda h*dido pa semper? Algun hende a perde speransa, pero gran mayoria ta mira e potencial y sa cu tin miho dianan na caminda.

E siman aki tabata tin e prome edicion di ‘Forum On The Future Of San Nicolas’ y nos ta puntra nos mes despues di tanto encuentro, plan cu a faya y boshi promesa bashi, kico ta haci esaki algo diferente?

San Nicolas: tin speransa pa desaroyo y cambio?

E forum aki tabata un iniciativa organisa pa Development Economist & Nation Builder, Suzette Dumfries. Esaki tabata un encuentro cu a tuma luga na Santa Teresita hunto cu representantenan di gobierno, sector priva, inversionista, organisacion comunitario y habitantenan tambe, cu e meta pa comparti resultado di investigacionnan haci tocante realidad social, economico, cultural y institucional di e ciudad.

E diferencia di e encuentro aki ta simplemente cu e ta un proceso totalmente independiente – unda tin tur hende hunto na mesa, for di gobernantenan te cu comerciante, y habitantenan di San Nicolas, pa asina duna un presentacion cu asina hopi informacion y detaye basa riba mas di cinco aña di investigacion – cu e meta pa cuminsa habri mente y trece hende hunto pa mira dicon San Nicolas a ‘keda pega’ den su desaroyo, kico tur ta posibel, anto con nos por yega na dje.

Pronto lo bini un siguiente encuentro pa asina sigui riba e caminda pa progreso y direccion necesario di San Nicolas su futuro desaroyo.

Djis Pa Informa ta presenta pa Awemainta: E diferencia den Noticia.