Segun Minister: Grupo di studiante bayendo Hulanda e aña ‘ki ta ‘hopi chill’

E grupo di studiante cu a sali bay Hulanda diaranson ta mustra di ta cla p’e reto nobo y tambe di ta ‘hopi chill’ segun minister di Educacion, Gerlien Croes – kende tabata presente durante nan salida.

Placa ta tarda di pasa pa studiante?

109 studiante (cu lening) hunto cu 8 studiante como “free movers” a sali bay Hulanda riba diaranson 5 di augustus, y di esnan cu nos a combersa cu nan, ta mustra berdad cu nan ta ‘hopi chill’ of dus trankilo, kisas poco nervioso y tristo cual ta normal, – pero nan ta mustra di ta mentalmente prepara pa nan siguiente etapa di bida. Cual ta hopi great.

Awo, ban riba un asunto cuent’i cu placa cu no sa pasa na tempo. Un topico poco fastioso pero mester adresa esaki si. Nos lo ta curioso pa sa si esaki ta algo cu ta pasa frecuente, y cuanto studiante ta keda perhudica p’esaki? Segun Departamento di Enseñansa, e placa ta semper pasa na tempo.

“Pero wak,” Sharine Croes-Dubero ta bisa nos, “si bo manda peticion pa bo pago awe, bo no ta hay’e mañan.” E proceso ta dicta cu den cuater pa seis siman ta pasa e pago y ta haci esaki mayoria biaha mas lihe cu esaki. Y por ehempel tur studiante riba buelo di diaranson a haya nan placa, dus esey tambe ta hopi great pa sa. Spera cos keda great tambe. Paso ta placa toch cu mester paga bek, dus. Y sin lubida di menciona tur e responsabilidadnan cu tin pa cumpli cu ne, dus..sep.

Studiante pa bin bek Aruba: Ehhh?

Manera semper, tabata tin hopi yoramento na airport, mayornan y hobennan cu ta bisando ayo, e ta normal y den algun ocasion mas emocional cu otro. Algo cu ta birando normal tambe ta e hecho cu hopi studiante ta di opinion cu nan no lo tin gana di regresa bek Aruba despues cu nan caba nan estudio. Nan ta stima y haya falta di nan famia, pero e sistema na Aruba ta demasiado h*dido pa nan simplemente bin bek y traha un bon bida como hobe profesional.

E mandatario a enfatisa cu mayoria el a puntra y nan tin caminda di keda, of apartment caba. “Nos ta spera di por crea e espacio y lo necesario pa nos haya nan bek tambe eventualmente ora cu nan caba di studia.”

E minister kiermen cu Aruba ta trahando riba esaki y mester enfoca pa guia mas den e escogencia di necesidadnan cu nos tin mester den e mercado, dussss esey ta un di e puntonan di atencion. Nos no a papia di salario pero nos ta supone cu esaki ta algo cu ta tene hopi na cuenta. No por paga e profesional hoben aki cu ta regresa bek un salario di ‘baca flaco’ paso esey ta motibo number un dicon hopi di nan no ta ni pensa di regresa Aruba. Facts.

‘En todo caso…’, e studiantenan a haya acceso na diferente tayer tambe pa yuda prepara nan p’e meta nobo. Den esaki nan a guia nan cu diferente informacion cu tayernan cu a toca varios topico for di finansa te cu salud mental.

Nos ta desea nan tur un bon biahe y hopi exito den nan estudio.

Pa esnan interesa y cu kisas no tabata sa, nos a traha un documentario cortico riba e tema aki di bida di nos studiantenan na Hulanda, cual bo por mira aki: “Lagando Bo Neishi.”

Y nos ta den proceso pa traha riba un documentario hopi mas intensivo – unda nos ta bay mas profundo den e parti di salud mental, den colaboracion cu Stichting KOMPAS For Students.

Nos ta contando caba cu sosten di SETAR NV y actualmente sperando respondi di otro posibel fondonan Hulandes cu lo co-financia e proyecto. Nos prome proyecto ‘Lagando Bo Neishi’ a sirbi como guia pa studiantenan di examenklas na Colegio unda cu a sinta mira esaki hunto cu nan mentor pa asina combersa riba e temanan treci dilanti. Un orientacion hopi importante sigur, cu un toke humoristico y humano – p’e cos no bira mucho laaf!

Bo kier sa mas tocante e proyecto aki y con bo por yuda nos realisa esaki pa medio di sponsor of donacion?
Tuma contacto cu nos riba djispahari@gmail.com.

Djis Pa Informa ta presenta pa Awemainta: E diferencia den Noticia.