Hit & Run na Aruba: Pueblo ta firma pa aumenta castigo

Hit & Run na Aruba = WTF ta pasando? Si, Djis Pa Hari ta un pagina satirico pero nos tin diferente segmento manera Djis Pa Informa of Djis Pa Curiosidad, caminda cu dependiendo n’e tema – cos ta bira basta f*cking serio.

Fin di siman cu a pasa a inicia un accion di firma pa pone presion pa aumenta castigo di hendenan cu ta comete hit and run na Aruba, pasobra e castigo no ta gran cos aki riba nos isla. Pa basta crimen anto, hende semper a keha cu castigo ta mucho abao. E ta bisto tambe.

Nos a combersa cu Robinson de la Cruz Gonzales kende tambe ta ruman homber di un di e victimanan di e hit & run fatal na comienso di aña, señora Josely Paulina Vasquez Gonzalez, di e caso tragico cu a sosode dilanti di Wind Creek Casino.

E casonan tragico aki tin comunidad Dominicano na Aruba den shock ainda Hopi hende a acudi n’e yamado p’e accion di firma. Un señora a bisa cu a yega ora pa tin cambio anto a taha Minister Dowers pa pone presion pa aumenta castigo, cambia ley, scucha e pueblo y haci algo.

Hit & Run na Aruba: cos a bira manera free-for-all!

Tantisimo t’e casonan cu a bini dilanti ultimo tempo relaciona cu Hit & Run na Aruba: auto da dal hende laga nan benta abao pio cu’un animal. Ta laga nan atras y no ta responsabilisa nan mes. Basta na werki.
Un refleho di un sociedad cu mester ayudo, un sociedad cu ta perdiendo su mes den problema social, alcohol, y negativismo.

Bistiendo su pechi di periodista, siendo un periodista y presentador na Republica Dominicana, Robinson a bisa cu awor mas cu nunca e medionan di comunicacion den Caribe mester uni. Wak ful e reportahe ariba y laga bo comentario. Un cos ta sigur si: mester haci algo, pasobra cos no por simplemente keda asina mas. Pueblo no ta bay permiti esaki.

Abo ta haya cu aumento den castigo di hit & run na Aruba lo yuda? Kico mas mester wordo haci?

Djis Pa Informa ta presenta pa AweMainta, e Diferencia den Noticia!