Nos hobennan tin miedo di cay

Nos hobennan, tin miedo di cay. Nos a pone e titulo aki mas bien manera un frase enbes di un pregunta – pero e ta un pregunta tambe, ora bo wak bon e comportacion den nos hobennan. Nan tin miedo di cay.

Nan ta bay over na bira hoben adulto, y ainda no ta siña. Pa despues yega na bira mas grandi den bida y algun lamentabelmente ta siña te na bieu, cu ora bo cay, esaki ta parti tambe di e proceso di bida.

Den e prome episodio aki den loke ta nos serie di documentacion di e proyecto IN THE PICTURE, nos ta papia tocante con nos hobennan, nos hendenan, nos comunidad – tin miedo di cay. Esaki ta un curiosidad cu nos tin. Miedo pa cay. Pa kico? Ora cu bo cay bo tin dos opcion: bo ta keda ey bao, of bo ta lanta para. Sinembargo, lanta para ta eigenlijk e unico opcion, pasobra eybao bo no por keda.

Den e prome episodio aki nos ta explora esaki simbolicamente, pero tambe con esaki a sosode di berdad cu un di e participantenan cu a letterlijk dal abao. Nos tur tin les pa siña di e tipo di storianan aki.

Hobennan na Aruba: cla pa un reto nobo?

Den comienso di luna di februari 2026 a tuma luga e apertura di loke ta programa ‘In The Picture’ presenta pa Stichting JA IK Aruba den colaboracion cu Departamento di Asuntonan Social y Departamento Pa Labor, cubri pa Oranje Fonds, y CEDE Aruba cu a yuda conecta tur hende y pone cos pasa!

Tin hende cu a participa den e prome edicion kende awor tin bon trabao anto a logra siña hopi cos exitosamente, y ta premira cu e programa aki lo bolbe cambia algun bida di esunnan cu ta pone di nan parti.

Esaki ta un programa specialisa pa prepara personanan cu ta den bijstand pa asina por haya oportunidad pa trabao, unda nan ta siña diferente aspectonan manera etica laboral y liderazgo personal.

“E ta hopi importante pasobra un persona mester biba cu dignidad y bon calidad di bida, y hopi biaha e suma di bijstand ta djis un suma pa yuda e persona sobrevivi. Sinembargo bo tin hopi famia na Aruba cu si nan por haya un trabao y chens pa desaroya nan capacidadnan, e ta yuda cu calidad di bida cu nan por tin”, Mervin Wyatt-Ras, Minister di asuntonan social a bisa, kende tambe tabata presente n’e apertura.

E programa aki ta brinda e participante pa siña e habilidadnan cu lo yuda nan duna nan mas structura den bida, siña con pa presupuesta nan placa, tambe nan yiunan ta haya guia cu nan yiunan si nan ta mayor, como tambe sosten di psicologo.

Nos hobennan mester: Crecemento personal y profesional

Esaki ta un trayecto cu lo dura cuater luna y mey caminda cuarenta departamento di Asunto Social cu ta ricibi sosten financiero y sosten di guia social, lo forma parti di esaki cu e meta pa drenta bek den mercado laboral.

E trayecto aki lo encera les, tayer, y bishita diferente organisacion local pa keda inspira y motiva den loke nan lo kier sigui haci como carera profesional. “Nos semper ta purbando di purba e cliente central y bienestar pa nos tur, mas brindando mas crecemento personal y profesional na nos clientenan”, segun Marceylaine Paskel, Vocero di Sociale Zaken.