Nos hobennan no tin suficiente confiansa den nan mes?

Na Aruba ta parce hopi biaha cu nos ta gusta tuma cos suave – nos ta haci nos best, pero net suficiente – nos no ta gusta pusha mas duro y hopi biaha masha tiki di nos ta bay “e extra mile” pa por logra algo, caba cu algo of simplemente haci algo, sea ta scol, famia of trabao. 

Den Episodio uno, nos a bay mas den e parti di miedo, di cay, di faya, di enfrenta obstaculo. E pregunta cu nos kier enfoca riba dje den e episodio aki ta: Nos hobennan tin suficiente confiansa den nan mes? Of con?

Nos hobennan: kico ta strobando nan pa bay dilanti?

Na comienso di februari 2026, a tuma luga e apertura di e programa In The Picture  presenta pa Stichting JA IK Aruba den colaboracion cu Departamento di Asuntonan Social y Departamento Pa Labor, cubri pa CEDE Aruba y Oranje Fonds. 

Esaki ta un programa specialisa pa prepara personanan cu ta den bijstand pa asina por haya oportunidad pa trabao, unda nan ta siña diferente aspectonan manera etica laboral y liderazgo personal. Den tur esaki nan ta midi potencial di e participantenan, kico ta nan forsanan natural, kico ta strobando nan pa bay dilanti.

E programa aki ta brinda e participante e oportunidad pa siña e habilidadnan cu lo yuda nan duna nan mas structura den bida, siña con pa presupuesta nan placa, maneho di tempo, y liderazgo personal.

Tambe nan ta haya guia cu nan yiunan si nan ta mayor, hunto cu sosten di psicoloog.

E participantenan a cuminsa na sinta un pa un cu e coach – cumisando cu algun oranan largo di combersacion y preparacion di loke lo bira simannan largo di charla, huiswerk, y bishita na diferente compania, pa un periodo di cuater pa cinco luna.