Cu Tanto cos online awendia: Nada ta special mas?

Awendia, internet ta basicamente un buraco preto (blackhole) cu si bo no tin cuidao, e ta chupa bo completo den un mundo yena cu boshi diferente porkeria. Y ora bo caba di scroll, bo ta pone bo cel un banda y toch sinti un bashi. “Ki caraho mi a caba di wak?” ta hopi biaha e pregunta cu nos ta bin ta haci nos mes ultimamente ora nos ta online.

Si nada online ta special mas, kico lo pasa cu internet?

Ora cu nos (Djis Pa Hari) a cuminsa, casi dies aña pasa, nos tabata un sensacion online. Djis Pa Hari tabata publica varios diferente videonan comico cu tabata burla entre otro nos sistema, of diferente topiconan social y politico den nos comunidad – nos tabata percura pa semper pone bo hari y dal bo cu e mensahe. Algo cu no tabata pasa frecuentemente. E tabata algo anticipa, e tabata tin un sentimento special cu ne. Tin hende tabata warda pa wak kico Djis Pa Hari lo publica riba un tema of otro.

Tempo a pasa, y nos mester a haya nos mes obliga pa expande, pa desaroya otro tipo di contenido cu ta mas educacional, y hasta informativo. Nos mester a dicidi pa ‘move-on’ y bay na cosnan mas productivo hasta. Purbando toch di mantene nos nomber.

Awendia, nos ta mira un cantidad enorme di ‘influencers’, of creadornan di contenido cu a bini ta haci cosnan great, pero cu ta poco poco no duna bo gana di mira nan mes ora cu bo dal den nan online. Nos ta papiando aki di sketches tambe manera nos tabata sa haci, a pesar cu varios ta di masha poco calidad of cu poco pensamento poni nan tras, te cu contenido horta for di otro creadornan internacional.

Dus nan ta mira cosnan afo, copy-paste nan y asina keda traha e mesun porkerianan dia aden y dia afo.

Nos tambe tabata un di e promenan pa cuminsa cu podcast, pero pa nos duna pueblo e plataforma pa nan papia nan dolornan, comparti nan ideanan, conta nan storianan. Awendia, Buchi cu Jan y ken cu ta tin podcast anto ta sinta papia delaster un porkeria sin sentido, yamando esaki ‘contenido’ local.

E ta pasando afo tambe – internet ta awor asina yena cu tanto cos cu e ta simplemente increibel ora bo sinta pens’e. Tur hende kier un stem, tur hende kier briya, tur hende kier stand-out. Pero, na costo di kico?

Awendia, bo ta subi online y ta parce cu casi nada ta “special” mas – bo ta sigui scroll y topa tur dia cu e mesun porkerianan, cada bes mas tristo of ridiculo cu e ultimo.

Varios hende cu ta consumi cosnan riba internet no ta ni worry. Nan ta scroll na trabao, nan ta scroll despues di trabao, nan ta scroll riba WC, nan ta scroll despues di sali f’e WC, nan ta scroll ora nan yega cas, nan ta scroll ora nan ta sali, y asina nan ta keda sin sa cu nan ta deep den e buraco preto di internet.

Con nos por confirma esey? Pasobra hopi hende no ta ni Like cosnan cu nan ta mira, of comment, y si nan Like mes e ta automatico, sin sentimento. Si nan comment tambe, ta pa sinti nan mes como parti di algo. Pero e ta ‘short-lived’ y p’esey hopi ta gusta discuti den comments. E ta algo psicologico.

Nan por a smile un rato, pero e cos no a realmente pone nan hari. Nan por a scucha algo ‘nobo’ y asina mes siña niun caraho.

Si awendia cu tanto cos cu tin online, y nada no ta special mas, ta kico ta bay bini next? Y con nos lo bay trata cu un generacion cu ta custumbra na tin stimulacion constante online?

Kico si lo bira special? Of di awo pa dilanti nos tin cu considera cu nada realmente lo ta nobo of special mas? Puntra nos ta puntra, Djis Pa Curosidad.