Polis tin algun decada caba ta sufri di mesun problema na Aruba

Nos ta corda cu aña pasa a bini henter un manifestacion y coleccion di firma pa polis di Aruba haya bodycam, den conexion cu e caso fatal di e hoben Ayden Lanoy. Riba di esey, parlamento di Aruba a pasa un mocion cu ta instrui gobierno pa pone e asunto aki como maximo prioridad y ekipa e Polisnan cu e materialnan necesario.

Hopi cos a wordo bisa. Hopi potret a wordo saca. Mas cu un aña a pasa, y te ainda nada a wordo haci.

Polis di Aruba tin basta aña ta pasa den duro

Sindicato SPA a manda un carta pa comision di husticia den Staten, y nan no a haya reaccion tampoco, ni for di minister di husticia, riba e asunto aki pa regla materialnan pa Polis, particularmente un bodycam cu dashcam.

A keda comproba cu por ehempel na Merca despues cu a introduci uzo di bodycam y dashcam pa Polis, casonan civil a baha drasticamente, y ta material cu ta yuda masha hopi den parti di investigacion.

Algo simpel – pero ni esey por keda regla aki na Aruba. Nunca tin placa.

Nos a scucha Lito Lacle di SPA ultimo tempo bini dilanti cu un lista largo di dolornan cu ta biba den KPA, for di falta di material te uniform na werki, y awo hasta coleganan cu ta retira.

E ultimo promesa tabata bodycams.

Cuerpo Policial di Aruba aparentemente tin un historia largo di a pasa den duro – na 1993 sindicato SPA a trece dilanti cu e salario tabata un porkeria, na 1995 a raporta scarcedad den auto di polis, y asina nos por sigui.

E efecto awendia ta cu Polis ta traha con cu nan por, y cu loke tin – hopi anja sperando riba un milager, of sikiera algo.

Tin biaha bo tin cu puntra bo mes si e polisnan lo ta miho ekipa cu otro tipo di materialnan manera por ehempel un tazer mes, si esaki lo por a evita tragedianan cu a sosode den pasado.

Djis Pa Informa ta presenta pa Awemainta: E diferencia den Noticia.