Ainda no tin solucion pa ora Polis atende caso di persona cu problema mental?

Nos tur sa cu e asunto di problema mental rond mundo awendia ta un tematica hopi complica, y cu ta biniendo mas y mas dilanti. Aki na Aruba, Polis ta atende na un caso caminda tin persona ta fuera di control, tin un of otro problema psikiatrico, niun hende sa con pa deal cu e situacion – y direpente morto ta cay. Cosnan cu a yega di pasa aki na Aruba un tiki mucho hopi ultimo añanan.

Sindicato di SPA, Lito Lacle, den un entrevista anterior cu nos cual bo por mira AKI, a laga sa cu nan ta wardando riba Respaldo pa firma e convenio entre nan hunto cu Ambulans Dienst di IMSan, mientras cu Respaldo ta bisa cu for di nan banda tur cos ta cla caba.

Polis mester guia den asisti caso unda tin hende cu problema mental

E ora ta kico mester pasa pa cuminsa bin un cooperacion real entre instancianan concerni pa atende cu e asunto aki prome cu sosode mas tragedia y pa kico el a tarda asina hopi?

Director di Respaldo, Caroline Hart, a laga sa cu Respaldo no ta wardando rib’e firma di convenio cu Polis pa por actua riba e asunto aki. Pasobra problema mental no ta un cos di haci wega cu ne, e ta un parti fundamental di nos salud como hende tambe, unda cosnan por ta super bon, te cu super malo si no keda atendi.

E director di Respaldo ta bisa nos cu nan ta bezig caba cu hopi cos ultimo tempo riba e desaroyo di e tema di asistencia policial na persona cu problema di salud mental. Te hasta a sugeri pa incorpora cierto module den Scol Pa Polis, y hasta esaki ainda ta pendiente pa realisa. Nos a compronde cu pa hopi Polis cu ta subi caya awendia, e cos di mas fastioso y peligroso pa nan ta birando asistencia na hende cu problema mental.

Nos sa e cos ta serio di basta tempo caba. Dus, kico ta pasando cu cosnan no ta cana mas lihe? Ta algun di e preguntanan principal rond di e henter e asunto aki.

Djis Pa Informa ta presenta pa Awemainta: E diferencia den Noticia.