Ta hopi importante pa conserva nos herencia

Nos herencia, pa proteha y conserva esakinan debidamente, ta puntonan di dialogo cu ta keda bini dilanti awendia mas y mas. Nos herencia cultural, nos arte, tur loke nos ta traha y crea. E topico ta bini hopi dilanti ultimo tempo.

Of wel, esey nos a medio ripara. Algun luga unda por ehempel ta papia di digitalisacion, organisacionnan of departamentonan di gobierno cu ta mane pega 100 aña atras cual finalmente a cuminsa realisa:

“Aha! nos tin cu cuminsa inova nos mes, of nos lo definitivamente bay den c*ño por completo.”

Nos Herencia, Nos Cultura, nos sa kico e ta si?

Pa gran mayoria, nos por mira cu ta perdiendo poco e bista riba e importancia real di proteha y conserva tur loke ta nos herencia y cultura – palabranan cu nos ta scucha tur caminda uza den forma poetico pero casi nunca nos ta scucha esaki splica den placa chikito.

Mas simpel cu nos por pon’e pa bo ta: Si aki 50 of 100 aña, hende kier mira bek pa sa con nos a desaroya, kico tabata nos retonan, kico ta e cosnan cu nos a crea cu e recursonan cu nos tabata tin sea limita of no – lo ta hopi zuiver si nan lo por tin bon material pa studia y deduci di berdad kico tur a sosode durante e temponan aki.

Di e forma aki, nan – dus nos futuro generacionnan, lo por tin e chens pa compronde miho for di unda nan a bin, ken nan ta, y unda nan ta bayendo.

Sigur, tin hopi mas cos cu ta cay bao di esaki – manera nos nivel intelectual, con sabi of p*ndeu nos tabata ta – nan lo kier mira con nos a trata cu educacion, salubridad, husticia, kico ta e foutnan cu nos a comete como tambe cosnan bon cu nos a logra.

Proteccion di nos herencia, di nos cultura, por medio di tur loke ta materialnan di buki, arte di tur forma, tur loke nos ta skirbi y documenta awendia visualmente – ta cosnan cu sigur tin mas balor cu placa pasobra nan lo biba pa semper.

Djis Pa Informa ta un segmento presenta pa AweMainta: E diferencia den noticia!