Di Tik Tok pa hospital: Ken ta interveni prome cu ta hopi laat?

Loke a cuminsa cu menasa y provocacion riba rednan social entre algun hoben, segun un mama ta conta nos, despues di algun tipo di desacuerdo y pelea entre amigonan – a termina den un agresion fisico contra su yiu, cu mester a haya tratamento den hospital.

E mama ta conta cu, prome cu e agresion, e tabata preocupa di e menasanan cu tabata circula riba TikTok riba su yiu. E ta splica nos cu el a acudi na autoridadnan, pero e agresion toch a sosode.

Di Tik Tok pa Hospital: Ken ta responsabel pa interveni?

E caso aki ta lanta un pregunta mas grandi: con rednan social ta contribuyendo na violencia entre hobennan? No ta trata solamente di cyberbullying. Menasa, provocacion y humillacion online por escala den violencia fisico. E caso particular aki a cuminsa cu menasa haci via Live Streams riba Tik Tok, tin tanto prueba. Pero ni un musca a bula anto e mucha toch a keda agredi. Cos por a bay hopi mas pio di loke el a bay tambe.

Aruba no ta desconoci cu e problema aki. Un estudio di 2026, haci pa encargo di Ministerio Publico, ta identifica e rol di rednan social den conflictonan entre hobennan cu por termina den violencia.

Nos no tin confirmacion independiente di cua pasonan a wordo tuma pa medio di autoridadnan despues di e prome denuncia.

Pero, e caso aki ta lanta un otro pregunta importante: ora cu un menor ta wordo menasa online, ken ta interveni, y ki ora? Pasobra prevencion no por cuminsa solamente despues cu un mucha termina den hospital.

Djis Pa Informa ta presenta pa Awemainta: E diferencia den Noticia.