Comunidad mester keda critico riba calidad di producto den supermercado

Prijs ta un cos — pero ora ta trata calidad di producto, esey ta ful un otro cos. Dus bendemento di cosnan bieu, cu fecha di vencimento di basta siman of luna, productonan daña, y asina por sigui. Nos a puntra gobierno recientemente durante un conferencia di prensa si tin control riba esaki, y con frecuente, di cual minister Wever a contesta nos cu nan tin instancianan y departamentonan encarga cu esaki.

“Tin un ehercicio haci periodicamente, un cooperacion entre diferente departamento”, segun minister Wever. E ta accionnan cu ta tuma luga menos frecuente cu e prijsnan pasobra no tin instrumento legal aworaki pa por actua contra esey.

Esnan encarga cu e control aki y cu hopi mas, ta Departamento di Higiena, y nos a bishita Yvette Geerman kende ta na cabes di e departamento pa splica nos un poco tocante e proceso. Nan a splica nos cu nan tin inspector encarga cu diferente area rond nos isla, cada uno responsabel pa nan area. E importante pa compronde ta cu comunidad tambe tin su rol den esaki, si nan mira algo fout, pa por entrega keho n’e departamento pa asina por tuma debido accion. Bo por scucha mas di esaki den e entrevista ariba.

Dus den otro palabra: no ta nan so mester move nan s*nca, nos como pueblo tambe mester ta atento di kico ta bende nos, y den ki bon condicion esaki ta p’e no tin consecuencia malo pa nos salud.

Calidad y higiena den supermercado: Cultura tambe ta hunga rol

Un punto di bista nan ta bisa ta e cultura di mayoria doño di supermercado. Segun DWH, e diferencia den cultura di diferente tipo di hende di rond mundo cu ta opera supermercadonan aki na Aruba ta keda hunga un rol toch den comunidad. Tur hende tin nan mesun manera. Pero tin ley. Y mester cumpli cu ne.

Te cu ainda, por cera bo negoshi pa maximo di 48 ora si constata cu bo a kibra e ley aki. Un consecuencia toch basta pisa segun DWH. Pero, tin luga y posibilidad pa haci mas ainda.

Djis Pa Informa ta presenta pa AweMainta: E diferencia den Noticia.