David Dania: ‘Aruba ta birando un isla cu bo no ta reconoce’

‘Aruba ta birando un isla cu bo no ta reconoce’ tabata e palabranan di pikido di dader, David Dania. El a bisa nos cu e tin mas cu 20 aña ta haci esaki, dus piki dader y educa nos bishitante y localnan tocante e fruta aki cu ta crece riba nos cadushi.

David a conta nos cu tempo di su tempo, e ta corda con nan tabata piki esakinan den mondi. Prome cu nos muchanan tabata tin internet of television, naturalesa di Aruba tabata e distraccion of atraccion di mas grandi.

David a bisa nos cu mas tempo pasa, el a bin ta ripara cu menos hende ta practica cosnan tradicional di nos cultura, manera por ehempel den e caso aki conocemento riba e fruta di dader y nos flora cu fauna .

E pikido di dader a bisa cu Aruba ta birando un isla cu bo no ta reconoce, simplemente pasobra mas tempo pasa ta parce nos ta bira mas ‘Americanisa’ cu awor tur nos muchanan ta lanta papiando Ingles enbes di Papiamento.

Y asina nos ta sigui, te na momento cu nos no ta reconoce kico t’e balornan autentico di nos isla – loke ta di nos, ken sa kico e ta?

Djis Pa Informa ta presenta pa AweMainta: E diferencia den Noticia.