Sharina Henriquez: Ban habri dialogo nacional tocante topico di Morto

Morto...algo cu nos no ta pensa mucho di dje tur ora, pero e ta forma un gran parti di nos bida, vooral ora e toca nos porta.

Nos tabata tin un bishita bastante peculiar recientemente na studionan di Wavez durante Djis Pa Hari Radio Variety Show pa papia tocante un tema hopi taboo mes: Morto.

Morto, su proceso y sufrimento

Periodista Sharina Henriquez a bishita nos pa combersa y haci apelacion pa habri un dialogo nacional tocante diferente aspecto rond di e topico di morto, den conexion cu un proyecto cu el a cuminsa awor cu fase di investigacion.

E mester di pueblo pa yud’e cu esaki, cu storianan, experiencianan y kico cu por comparti riba e proceso di muri na Aruba, como tambe kico nos ta desea of con nos lo kier muri, kico por mehora tambe den e parti di sufrimento ora tin enfermedad cronico.

E proyecto cu e ta trahando riba dje ta relata na morto, sufrimento, pa kico hende mester sufri asina ora ta den fase di muri pa medio di un enfermedad cronico, famia, religion, spiritualidad, emocion, y tur loke ta hunga rolnan clave rond di morto. Un tema cu casi nunca nos ta haya nos mes ta papia di dje abiertamente, y esaki ta algo cu Sharina kier cambia cu su proyecto.

Den e entrevista completo bo lo por scucha mas detaya y wak con leu e combersacion aki a bay – cual pronto lo resulta den podcast, documentacion y pelicula, cu e meta pa conscientisa y habri mente tocante e tema.