Mucha y hoben cu no por regula emocion: esaki por ta un motibo grandi pa kico tin diferente caso andando ultimo tempo?
Den nos buskeda pa sa kico ta pasando cu nos hubentud mirando e desaroyonan recien unda bo ta haya casonan unda varios hende jong ta envolvi cu husticia den un of otro forma – nos a bishita un luga na Dakota cu kisas masha tiki hende sa di dje: Centro Multidisciplinario Aruba.
Regula emocion: un reto grandi pa hopi mucha y hoben awendia
E motibo di nos bishita ta pa conoce un poco mas riba kico nan ta haci, y comparti conocemento den e area di inteligencia emocional di nos muchanan y hobennan, entre otro, anto con ta trata cu esaki. Loke nos por a confirma mesora for di un profesional riba veld ta cu di berdad e casonan cu muchanan cu problema pa regula emocion ta birando mas compleho.
Tin hopi factor cu ta hunga rol ora ta trata den e caso aki di un of mas generacion cu a wordo lanta na cierto manera, cu awendia a bin ta lanta nan yiunan mescos. Y esaki posibelmente por ta un factor grandi den e tipo di hobennan cu nos sociedad por ta cultivando. Mucha of hoben cu ta crece cu dificultad pa regula emocion, por trece cune mas diferente tipo di problema social den futuro.
Annemarie Tromp, kende ta terapista psychomotorico na MDC, ta bisa nos cu awendia el a cuminsa ripara cu e parti aki di su trabao sa bira mas intenso. “Muchanan por rabia mas, nan no sa controla nan curpa. Locual mi ta mira tambe ora mi yuda e muchanan ta cu e problema ta bin di cas tambe. Dus con mayornan ta anda cu nan mesun emocionnan.”
E centro aki ta ekipa cu hopi profesional y toolsnan, aunke nan tin nan retonan tambe – por toch mira cu nan ta bon prepara y ta haci nan best. Apesar di tur cos, aki tambe nos a haya un otro indicacion cu di berdad tin mas tras di e tema aki, cu ta conecta na con nos ta formando nos muchanan, y ki tipo di hende nan lo bira den nos sociedad.
Nos lo sigui cu e tema aki den combersacion cu mas experto y profesional den e veld. Mientrastanto, por lesa otro publicacionnan cu nos a haci riba e tema caba den pasado, manera esaki: TIN HOPI HOBEN CU PROBLEMA DEN REGULA EMOCION NA SCOL, of esaki: 131 ARUBA: MESTER EDUCA NOS MUCHANAN TOCANTE INTELIGENCIA EMOCIONAL.
Djis Pa Informa ta presenta pa Awemainta: E diferencia den Noticia.
Di Tik Tok pa hospital: Ken ta interveni prome cu ta hopi laat?
~ October 18, 2026
Loke a cuminsa cu menasa y provocacion riba rednan social entre algun hoben, segun un mama ta conta nos, despues di algun tipo di desacuerdo…
Aruba por progresa hopi cu creatividad y arte | UNSHOW EP. 15
~ October 16, 2026
Abogado, Desiree Croes, ta un persona hopi serio, pero tambe hopi creativo. Ex parlamentario, politico, pero e ta un persona cu gusta crea. Creatividad: Un…
‘Tene cuidao den tuma cos pa baha peso sin bon guia’
~ October 14, 2026
Ultimo tempo tin un trend andando di hendenan cu ta mustra comosifuera cu algo a chupa nan seco despues di uza cosnan pa baha peso….