‘Seguridad di alimentacion ta cuminsa na sanacion di nos pueblo’

Siguiendo riba e tema di seguridad di alimentacion, nos a bishita un cunukero local na Petite Greens Aruba kende a comparti cu nos nan experiencia den agricultura como tambe kico ta nan pensamento riba e topico pa nos isla. Kisas algun di boso ta haya e cosnan aki laaf, pero esey ta boso cuenta.

E topiconan aki ta keda importante pa documenta, dus ja. Nos lo zorg pa cubri otro temanan ‘mas interesante’ p’e resto di bosnan cu gusta otro cos.

Pero pa awo, ban papia di alimentacion: Kico Aruba mester haci?

Lorraine Cooijman V/D Bogaert ta un di varios cunukero local cu tambe tin añas ta warda riba tereno pa agricultura, y cu ta haya su mes mester bira poco creativo na unda cu haya e oportunidad. Manera por ehempel colaborando cu su bisiña kende tin un tereno eigendom anto hunto a bini na un acuerdo pa Lorraine uza esaki pa planta y tin producto pa mercado.

Lorraine tambe ta un cunukero cu ta opina cu nos mester cuminsa na traha riba nos mes como pueblo, pa asina por sa con pa traha cu nos tera y yega na un seguridad di alimentacion berdadero. Hopi di e cunukeronan local ta enfatisa riba esaki: conecta bek cu naturalesa, siña mas tocante nos tera y kico nos por planta akinan, y con esaki ta forma parti di nos cultura y historia di alimentacion.

Djis Pa Informa ta presenta pa Awemainta: E diferencia den Noticia.