Yevison Sanchez: Aruba mester admiti si ta bon prepara of no pa duna asilo na refugiado

Asilo na refugiado – yeah right, mi sa algun di boso lo mester por ta pensando cu nos mes mester di ayudo y asilo akibanda. Pero, fuera di tur ignorancia y joke, mirando e cosnan cu ta pasando rond di nos aworaki, ta miho nos cuminsa tuma cosnan poco mas na serio si y cuminsa siña pa no tene miedo di haci e preguntanan menos comfortabel. Manera, con prepara Aruba ta di berdad p’un crisis di refugiado, si algo mester bay hopi robes pazuid di nos aya?

Asilo na refugiado: hopi di nos no sa con serio e tema ta!

Gobierno, of e estado di Aruba in general no a mustra ainda di ta prepara pa un situacion cu lo mester brinda asilo na refugiado – sigur di nos rumannan pazuid na Venezuela, si cos mester bay ful for di man un djis.

Esey segun nos invitado special Yevison Sanchez di Foundation For The Development and Psychosocial Empowerment, kende nos a invita pa bin duna nos un splicacion chikito riba diferente aspecto relaciona cu asilo, durante Djis Pa Hari Radio Variety Show den studionan di Wavez.