Cuida curpa: Na Aruba tin hopi hende hayando stroke na edad jong

Stroke na edad jong? Con esey por y con jong nos ta papiando? Nos hendenan mester cuida curpa, cuida salud, pasobra aparentemente tin un fenomeno caminda cu hende ta hayando Stroke na Aruba, y na un edad hopi jong mes.

Segun Brenda Maduro di FUNARI Aruba, mester cuida curpa pasobra tin un fenomeno aworaki na Aruba y vooral cerca e hende homber.

Stroke na edad jong no ta wega shonnan!

Brenda tin 35 aña trahando na FUNARI, e tin hopi experiencia den trata cu personanan cu limitacion. El a tuma nota cu mester tene cuidao kico ta come y mester cuminsa cuida salud pasobra nan mes a tuma nota di ta hayando hopi cliente cu ta haya infarto na edad di 48 aña. Ta cos di para keto riba dje! “Esey ta unda nos kier yega. E mensahe universal pa yega n’e pueblo completo di Aruba, ban cuminsa na cuida nos curpa.”

FUNARI a pasa cerca nos na Djis Pa Hari Radio Variety Show na Wavez FM pa presenta nan produccion nobo titula ‘Nos Paranda’, esaki ta algo cu e fundacion ta haci tur aña pa conscientisa tocante personanan cu limitacion, traha pa nan clientenan den colaboracion cu nan boluntarionan. E produccion aki ta un himno di alegria pa e temporada di fin di aña na Aruba.

E cancion aki ta representa e ambiente di nos comunidad y specialmente e clientenan di FUNARI: Unda tin hopi union, hopi bendicion y hopi diberticion. E letra ta invita nos pa sali hunto, canta y celebra y cu nada  no ta stroba nos, mientras nos ta trece un mensahe di amor y speransa. Funari ta haci uzo di nos idioma universal pa plama alegria pa alivia bo dia, aki na  Aruba y pa mundo henter.

Kico ta FUNARI?
FUNARI ta un fundacion cu ta traha cu personanan cu limitacion fisico unda cu nan tin problema pa cana, persona den rolstoel, unda ta atende cu hendenan di 18 te cu 65 aña.

Nan ta bin FUNARI cu bus, ta come hunto cu nan, ta parti e hendenan den grupo y organisa diferente actividad social cu nan. Tin diferente actividad diario tambe cu ta organisa cu nan. Tin parti di ehercicio a base di loke nan por, musica, obra di man, y tambe nan ta activo den greenhouse.